AQShning Kolorado shtatida koronavirusning yangi B.1.1.7 shtammi bilan kasallanish holati qayd etildi, deb yozadi Meduza. Kolorado gubernatori Jared Polisning bayonotiga ko‘ra, bu mamlakatdagi birinchi shunday holatdir.
Yangi shtammni yuqtirib olgan odamning ism-sharifi sir tutilmoqda. Uning 20—29 yosh guruhiga kirishi ma’lum, xolos. Hukumat ma’lumotlariga qaraganda, bu odam uzoq safarlarga chiqmagan. Mutaxassislar uning muloqot doirasini aniqlashtirmoqda. Bemor Denverdan janubi-sharqda joylashgan Elbert okrugida yakkalanish rejimiga o‘tkazilgan.
Koloradoda yana bir kishi koronavirusning yangi shtammi bilan kasallangani gumon qilinmoqda, deb yozadi Colorado Politics. Bu odam ham, birinchisi kabi, Elbert okrugidagi Simla shahrida ishlaydi. Ularning hech biri bu okrugda yashamaydi, bu B.1.1.7 shtammi butun shtat bo‘ylab tarqalgani ehtimolini oshirmoqda.
Buyuk Britaniyada sentabr oyida koronavirusning yangi, yuqumliroq B.1.1.7 shtammi aniqlandi. Dekabr o‘rtalariga kelib, Londondagi kasallanish holatlarining uchdan ikki qismi virusning shu varianti bilan bog‘liq bo‘lib qoldi. 20-dekabrdan Britaniya hukumati yangi shtamm tufayli koronavirusga qarshi cheklovlarni kuchaytirdi. Ayni vaqtda yangi shtamm boshqa mamlakatlarda ham qayd etila boshladi. Xususan, Kanada, Italiya, Hindiston, Birlashgan Arab Amirliklarida “britancha” shtamm aniqlangan.
Izoh (0)