Коронавирус эҳтимол эндемик бўлиб қолади ва одам у билан ёнма-ён яшашга ўрганади. Бу ҳақда Жаҳон соғлиқни сақлаш ташкилоти (ЖССТ) эксперти, профессор Дэвид Хейманн маълум қилди, деб ёзади «РБК».
«Афтидан, SARS-CoV-2 одамнинг қолган тўртта коронавируси каби эндемик бўлиб қолади», — деди у. Мутахассис фикрича, вирус одам ҳужайраларида кўпайгани сари мутацияга учрашда давом этади, бу айниқса, касаллик кенг тарқалган ҳудудларда юз беради.
Эндемик касалликлар — маълум бир жойга боғлиқ бўлган инфекциялар.
Хейманн тахмин қилишича, одамлар коронавирус билан ёнма-ён яшай олади, чунки уларда аллақачон «ҳаётларни сақлаб қолиш учун воситалар» мавжуд.
ЖССТнинг фавқулодда вазиятлар бўйича дастури раҳбари доктор Майк Райан таъкидлашича, ҳозир ҳатто оммавий вакцинация ҳам вирус тарқалишини тўлиқ тўхтата олмайди. У одамлар учун жуда паст даражали бўлса-да, хавф бўлиб қолади.
Аввалроқ ЖССТ бош директори Тедрос Гебрейесус дунё ҳамжамияти 2021 йилда коронавируснинг янги штаммларини тадқиқ қилишга жиддий эътибор қаратиши кераклигини қайд этган эди. ЖССТ бош директори Буюк Британия ва Жанубий Африка Республикасига «тест ўтказиш орқали янги турларни аниқлагани» учун миннатдорлик билдирди, шунингдек, бошқа мамлакатларни коронавируснинг янги штаммлари ҳақидаги маълумотлар билан бўлишишга чақирди.
Буюк Британияда сентябрь ойида коронавируснинг янги, юқумлироқ B.1.1.7 штамми аниқланди. Декабрь ўрталарига келиб, Лондондаги касалланиш ҳолатларининг учдан икки қисми вируснинг шу варианти билан боғлиқ бўлиб қолди. 20 декабрдан Британия ҳукумати янги штамм туфайли коронавирусга қарши чекловларни кучайтирди. Айни вақтда янги штамм бошқа мамлакатларда ҳам қайд этила бошлади. Хусусан, Канада, Италия, Ҳиндистон, Бирлашган Араб Амирликлари, АҚШда «британча» штамм аниқланган.
Изоҳ (0)