So‘nggi bir kecha-kunduzda dunyo bo‘ylab 490 mingdan ortiq kishi COVID-19’ga chalindi, deb xabar bermoqda “Kommersant” Jons Hopkins universitetiga tayanib. Bir kun avval 432 mingta holat qayd etilgan edi. Dunyo bo‘yicha kasallikni yuqtirganlar soni qariyb 82 millionni tashkil etadi. Pandemiya boshidan buyon 1,7 million kishi koronavirus oqibatida vafot etgan.
Kasallanish holatlari soni bo‘yicha AQSh (19,5 million), Hindiston (10 million), Braziliya (7,5 million) va Rossiya (3 million) yetakchilik qilmoqda. Koronavirusga chalinish holatlari 191 ta mamlakatda qayd etilgan.
Eng ko‘p o‘limlar AQShda (338 ming), Braziliyada (192 ming), Hindistonda (148 ming) va Meksikada (123 ming) qayd etilgan. Rossiya sakkizinchi o‘rinda: mamlakatda kasallanganlarning 55 mingdan ortig‘i vafot etgan.
Avvalroq dunyo bo‘yicha koronavirusga chalinganlar soni 81 milliondan oshgan edi.
Ayni paytda bir qator mamlakatlarda koronavirusga qarshi emlash boshlangan. Xususan, Argentina, Slovakiya, Gretsiya, Germaniya, Vengriya, Shveysariya, Dubay, AQSh va boshqa mamlakatlar aholini ommaviy vaksinatsiya qilishni boshladi.
Shuningdek, koronavirusning yangi shtammi tarqalish geografiyasi ham kengaymoqda. So‘nggi ma’lumotlarga ko‘ra, “britancha” shtamm AQShda, BAAda, Janubiy Koreya va Irodaniyada ham aniqlangan.
Izoh (0)