Amerikaning prezident Tramp rahbarligidagi joriy ma’muriyati yangi keyingi ma’muriyatga ishlarni topshirish jarayonida o‘zini mas’uliyatsiz tutmoqda. Bu haqda AQShning yangi saylangan prezidenti Jo Bayden ma’lum qildi, deb yozadi “RBK”.
“Biz hozir ketayotgan ma’muriyatdan milliy xavfsizlikning asosiy sohalaridagi kerakli ma’lumotlarni ololmayapmiz. Mening fikrimcha, bu mas’uliyatsizlikdan boshqa narsa emas”, — dedi Bayden.
Shuningdek, uning aytishicha, keyingi ma’muriyatga vakolatlarning topshirilishida AQSh harbiy idorasidagi siyosiy rahbariyat ham to‘siq bo‘lmoqda. “Ba’zi idoralarda bizni qo‘llab-quvvatlashdi, boshqalarida esa, birinchi navbatda, Mudofaa vazirligida siyosiy rahbariyat tomonidan bizga to‘siq yaratildi”, — dedi Bayden. Siyosiy rahbariyat tomonidan to‘siqlar Oq uyning Ma’muriy-budjet boshqarmasida ham yaratilgan.
Baydenning so‘zlariga ko‘ra, Amerika xavfsizligi uchun muhim bo‘lgan ko‘plab idoralarga “ulkan zarar yetkazilgan”. “Ularning ko‘pchiligi xodimlar, imkoniyatlar va ma’naviy ruh nuqtayi nazaridan tushkunlikka tushgan”, — deya aniqlik kiritdi u.
Baydenning bayonotidan keyin Pentagondagilar vakolatlarni topshirish jarayoni doirasida barcha imkoniyatlarni ishga solishayotganini aytdi. “Mudofaa vazirligi ko‘rayotgan chora-tadbirlar allaqachon avvalgi ma’muriyatlarning xuddi shunday chora-tadbirlaridan oshishga ulgurgan”, — dedi AQSh mudofaa vaziri vazifasini bajaruvchi Kristofer Miller. Uning so‘zlariga ko‘ra, Pentagon o‘tish davrining qolgan vaqtiga qo‘shimcha uchrashuvlarni rejalashtirmoqda va ma’lumot taqdim etish haqida kelib tushgan talabnomalarning barchasiga javob bermoqda.
Dekabr boshida CNN razvedkaning sobiq yuqori mansabdagi amaldoriga tayanib, Tramp ma’muriyati Baydenning jamoasiga hokimiyatni topshirish jarayoni doirasida Pentagon razvedka agentliklari bilan uchrashishga xalaqit bergani haqida yozgandi. Baydenning safdoshlari idoraning Razvedka boshqarmasi va Milliy xavfsizlik agentligi vakillari bilan uchrasha olmagan.
2021-yil 20-yanvar kuni saylangan davlat rahbari demokrat Jo Bayden o‘z lavozimiga kirishishi kerak. Dekabr o‘rtalarida saylovchilar hay’ati Trampning saylovdagi bosh raqibini Amerikaning 46-prezidenti deb e’lon qildi. Bayden saylovchilar hay’ati a’zolarining 300 dan ortiq ovozini, amaldagi prezident esa 230 dan ziyodroq ovozni qo‘lga kiritdi. Baydenning inauguratsiyasi an’anaga ko‘ra Vashingtonda bo‘lib o‘tadi.
Izoh (0)