Сўнгги бир кеча-кундузда дунё бўйлаб 490 мингдан ортиқ киши COVID-19’га чалинди, деб хабар бермоқда «Коммерсантъ» Жонс Ҳопкинс университетига таяниб. Бир кун аввал 432 мингта ҳолат қайд этилган эди. Дунё бўйича касалликни юқтирганлар сони қарийб 82 миллионни ташкил этади. Пандемия бошидан буён 1,7 миллион киши коронавирус оқибатида вафот этган.
Касалланиш ҳолатлари сони бўйича АҚШ (19,5 миллион), Ҳиндистон (10 миллион), Бразилия (7,5 миллион) ва Россия (3 миллион) етакчилик қилмоқда. Коронавирусга чалиниш ҳолатлари 191 та мамлакатда қайд этилган.
Энг кўп ўлимлар АҚШда (338 минг), Бразилияда (192 минг), Ҳиндистонда (148 минг) ва Мексикада (123 минг) қайд этилган. Россия саккизинчи ўринда: мамлакатда касалланганларнинг 55 мингдан ортиғи вафот этган.
Аввалроқ дунё бўйича коронавирусга чалинганлар сони 81 миллиондан ошган эди.
Айни пайтда бир қатор мамлакатларда коронавирусга қарши эмлаш бошланган. Хусусан, Аргентина, Словакия, Греция, Германия, Венгрия, Швейцария, Дубай, АҚШ ва бошқа мамлакатлар аҳолини оммавий вакцинация қилишни бошлади.
Шунингдек, коронавируснинг янги штамми тарқалиш географияси ҳам кенгаймоқда. Сўнгги маълумотларга кўра, «британча» штамм АҚШда, БААда, Жанубий Корея ва Ироданияда ҳам аниқланган.
Изоҳ (0)