Dubay amirligi rasmiylari 2021-yil oxiriga qadar Pfizer va BioNTech vaksinasi bilan aholining 70 foizini koronavirusga qarshi emlashni ko‘zlamoqda, deb xabar qilmoqda Daily Star’ga tayanib “Interfaks”.
Qayd etilishicha, Dubay aholisi va fuqarolari uchun emlash bepul amalga oshiriladi.
Ma’lum qilinishicha, Dubay o‘tgan haftada aholini koronavirusga qarshi emlashni boshlagan. 60 yosh va undan katta yoshdagi odamlar, surunkali kasalliklarga chalingan odamlar, nogironlar va bevosita bemorlar bilan ishlaydigan kishilar birinchi navbatda emlanadi. Aprel oyidan boshlab qolganlarning navbati keladi.
Abu-Dabi amirligi ommaviy emlash uchun Xitoyning Sinopharm kompaniyasi tomonidan ishlab chiqilgan vaksinani tanladi, Dubay esa bu tanlovda Saudiya Arabistonidan o‘rnak olib, Pfizer vaksinasini bilan aholini emlamoqchi. Boshqa amirliklar Pfizer vaksinasidan favqulodda foydalanishga hali ruxsat bermagan. Har bir amirlik o‘z emlash dasturini ishlab chiqmoqda.
Jons Hopkins universitetining 29-dekabr kuni bergan ma’lumotlariga ko‘ra, BAAda pandemiya boshidan buyon jami 204 369 nafar koronavirusga chalinganlar aniqlangan. Bemorlarning 660 nafari vafot etgan.
Avvalroq Abu-Dabi amirligi o‘zbekistonliklarni 2 haftalik majburiy karantinni o‘tashdan ozod qilgani haqida xabar berilgandi.
Izoh (0)