Ўзбекистонда электр энергияси бўйича қарздорлик 3,5 триллион сўмни ташкил этмоқда. Бу ҳақда АОКАда ташкил этилган матбуот анжуманида «Ҳудудий электр тармоқлари» АЖ бошқаруви раисининг биринчи ўринбосари Жаҳонгир Обиджонов маълум қилди.
«Электр энергияси бўйича энг катта қарздорлик Самарқанд вилоятида: 655 миллиард сўм. Бу жами кўрсаткич, яъни юридик ва жисмоний шахсларнинг умумий қарздорлиги», — дея аниқлик киритади Обиджонов.
Айни вақтда республикамиз бўйича 3,5 триллион сўм қарздорлик мавжуд. 1 декабрь ҳолатига кўра, аҳолининг электр энергиясидан қарздорлиги — 2,34 триллион сўмни ташкил қилмоқда. 1 октябрь ҳолатига кўра, бу қарздорлик — 2,38 триллион сўм бўлган.
«2 ой ичида ушбу қарздорлик ҳолати 40 миллиард сўмга камайишига эришилди. Бу — айнан биллинг тизими жорий қилиниши натижаси», — дейди «Ҳудудий электр тармоқлари» АЖ раҳбари.
Аввалроқ Энергетика вазирлиги нега электр таъминоти учун мавжуд қарз тўлангандан сўнг, электр энергияси автоматик тарзда ишга тушмаслигига жавоб берганди. Унга кўра, АСКУЭ тизими истеъмолчиларнинг 100 фоизини қамраганидан сўнг тўлиқ тартибда ишлай бошлайди. Бугунги кунгача 72 фоиз истеъмолчиларга ушбу турдаги ҳисоблагичлар ўрнатилган. Ушбу тизимга тўлиқ уланиш 2021 йил апрелигача режалаштирилган.
Изоҳ (0)