“Hududiy elektr tarmoqlari” AJ faoliyatida elektr energiyasini hisobga olish va nazorat qilishning avtomatlashtirilgan tizimi (ASKUE) yo‘lga qo‘yilgach yetkazib berilgan elektr energiyasi bo‘yicha pul tushumi sentabr oyida 107 foizga bajarilgan. Bu haqda 24-noyabr kuni “Hududiy elektr tarmoqlari” AJ tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.

“Elektr energiyasi bo‘yicha to‘lov va qarzdorliklarni undirishda Majburiy ijro byurosi o‘ziga yarasha ishlarni amalga oshirdi. Ushbu vakolat MIBga o‘tmasdan avval energetika sohasida oyliklar uch, to‘rt oylab berilmas edi, soliqdan har oyda qarzdor bo‘lardik, to‘lay olmasdik. Bu tashkilot bilan birga ishlaganimizdan keyin mablag‘ ko‘p tushishni boshladi, maoshlarni oyma-oy to‘lashga o‘tdik va soliqlarni ham o‘z vaqtida to‘lashni boshladik. Lekin MIB bu ishlarni ma’lum haq evaziga qilardi: tushgan mablag‘dan 10 foizini o‘ziga olardi. ASKUE tizimi joriy etilgach MIBning vakolati yana o‘zimizga qaytarib berildi, ya’ni tashkilot pul yig‘ish jarayonidan chiqib ketdi. 2020-yilning avgust oyidan boshlab pul yig‘imi yana ‘Hududiy elektr tarmoqlari’ AJ vakolatiga o‘tdi. MIB pul yig‘ish jarayonida ishtirok etmaydi, faqat ijro bilan shug‘ullanadi. Sentabr oyi yakuniga ko‘ra, tashkilotimiz yetkazib berilgan elektr energiyasi bo‘yicha pul tushumini 107 foizga bajardi. Oktabr oyida ham 100 foizdan yuqoriladi”, — dedi “Hududiy elektr tarmoqlari” AJ boshqaruv raisining birinchi o‘rinbosari Jahongir Obidjonov.

Uning aytishicha, iste’molchilar e’tirozi tufayli MIB xodimlariga nisbatan xizmat tekshiruvi o‘tkazilishi kutilmoqda.

“ASKUE tizimi yo‘lga qo‘yilganidan so‘ng tumanlar, chekka hududlarga chiqib, aholi bilan ishlashni boshladik. Muloqotlar jarayonida iste’molchilarda qarzdorlikka oid turli tushunmovchiliklar yuzaga kelayotganining guvohi bo‘ldik. Ular ‘MIBga to‘lov qilgandim, sizlarning bazangizda ko‘rinmabdi. Qo‘limda to‘lov qilganim haqida qog‘oz bor, nima uchun bunday holat bo‘lgan’, deya haqli savollar bilan murojaat qilishdi. MIBga mablag‘ni to‘laganidan so‘ng u pul bizning hisobraqamimizga tushishi kerak. Ya’ni ishlatgan elektr energiyasiga to‘lov qilgach qarzdorlik kamayishi lozim. Haqiqatan, o‘sha paytda MIBga qilingan to‘lov bizning bazaga kelib tushmaganligi aniqlanyapti. Natijada iste’molchilarda bizga nisbatan e’tirozlar paydo bo‘lmoqda.

Shuni alohida aytish kerakki, bu kabi holatlar juda ko‘p uchrayotganligi tufayli Majburiy ijro byurosi direktori Hasan aka Kabirjonov bilan gaplashdik. To‘lovlarni yig‘ish vakolati MIBda bo‘lgan davrda aholidan pulni olgan, ammo kirim qilmagan MIB xodimlari ustidan xizmat tekshiruvi o‘tkazilishi va bu ish oxiriga yetkazilishiga kelishdik. Jabr ko‘rgan iste’molchilar ro‘yxatini shakllantirib, tuman va respublika MIBga taqdim etadigan bo‘ldik. Bu masala operativ ravishda hal etilishi rejalashtirildi. Yakuniy natijaning qandayligini xizmat tekshiruvidan keyin bilamiz”, — dedi Obidjonov.