Venada Jon Ottokar ismli 80 yoshli erkak Porsche Boxster Spyder’ni xarid qildi. Yangi rodster nafaqaxo‘r umri davomida sotib olgan 80-modelga aylangan. Erkak o‘z kolleksiyasini saqlash uchun alohida bino qurgan bo‘lib, u yerda sportkarlardan tashqari brendning tarixiga oid turli buyumlarni ham saqlab keladi, deb xabar beradi Motor.
Jon Ottokar o‘zining birinchi sportkari — sariq rangli Porsche 911 E’ni 1972-yilda sotib olgan. Shundan buyon avstriyalik kolleksiyasini uzoq yillar davomida boyitib kelgan. Erkak umri davomida 80 ta nemis sportkariga egalik qilgan, ular uchun alohida bino qurdirgan.
Ayni vaqtda 80 yoshli nafaqaxo‘rning 38 ta Porsche sportkari mavjud bo‘lib, ular orasidan bir nechta poyga avtomobillari ham o‘rin olgan, jumladan, V8 dvigateli bilan jihozlangan 917 va 910 modellari. Jonning ixtiyorida to‘qqizta Carrera RS, shuningdek, 911R va Type 911 modellari ham bor.
Avstriyalik so‘nggi bor Porsche Boxster Spyder’ni xarid qilgan. Rodsterga 375 ot kuchiga ega (420 Nm) 3,8 litrli V6 dvigateli o‘rnatilgan. Motor olti pog‘onali mexanik uzatmalar qutisi yordamida boshqariladi. Sportkar soatiga 100 kilometr tezlikka 4,5 soniyada erishadi, maksimal tezligi — 300 km/soat. Nafaqaxo‘r yangi avtomobili Suffenxauzendagi zavoddan shaxsan o‘zi olib ketgan bo‘lib, unga Porsche vakillari rodster kapotiga emblemani mustaqil o‘rnatishiga ruxsat bergan.
Avvalroq Norvegiyada Genri Harrfeldt ismli erkak 78 yoshga to‘lishi munosabati bilan 2018-yilgi McLaren 720S Spider rodsterini xarid qilgani to‘g‘risida xabar berilgandi.
Izoh (0)