O‘zbekiston Sog‘liqni saqlash vazirining birinchi o‘rinbosari A. Inoyatov boshchiligidagi delegatsiya Qirg‘izistonda bo‘lib qaytdi, deya xabar bermoqda Sog‘liqni saqlash vazirligi.
O‘zbekiston delegatsiyasi Botken viloyati Qadamjay tumani Markaziy tuman kasalxonasida bo‘ldi. U yerda Qirg‘iziston sog‘liqni saqlash vaziri Alimkadir Beyshenaliyev va Qirg‘iziston hukumatining boshqa vakillari ishtirokida shifoxonaning ochilish marosimi bo‘lib o‘tdi.
Ikki tomonlama muloqotlar davomida sog‘liqni saqlash sohasidagi o‘zaro hamkorlik aloqalari, shu jumladan, COVID-19’ga qarshi birgalikda kurashish masalalari muhokama qilindi. Shuningdek, tomonlar yuqumli kasalliklarni davolash, tashxislash va oldini olish bo‘yicha o‘z tajribalari bilan o‘rtoqlashdi.
Alimkadir Beyshenaliyev yuqumli kasalliklar shifoxonasining qurilishi, uning jihozlanishida ko‘rsatilgan amaliy ko‘mak va taqdim etilayotgan gumanitar yordam uchun O‘zbekiston tomoniga minnatdorchilik bildirdi. Shuningdek, pandemiya davrida moliyaviy imkoniyatlar hamda davolash muassasalarida shifo o‘rinlari yetishmayotgan shunday murakkab sharoitda o‘zbekistonliklarning ushbu ko‘magi yuqori baholanishini aytib o‘tdi.
Zamonaviy shifoxona qurilishi va jihozlanishi to‘liq O‘zbekiston tomonidan moliyalashtirildi va qisqa muddatlarda foydalanishga topshirildi. Muassasa zarur tibbiy jihozlar va mebellar bilan to‘liq jihozlangan bo‘lib, bemorlar uchun barcha sharoitlar yaratilgan.
200 o‘rinli yuqumli kasalliklar shifoxonasining ochilish marosimida so‘zga chiqqanlar Shavkat Mirziyoyevga va o‘zbek xalqiga minnatdorlik bildirib, ushbu tashabbus qirg‘iz–o‘zbek xalqlari orasidagi azaliy do‘stlik munosabatlarini yanada mustahkamlashini ta’kidlashdi.
Shuningdek, Qirg‘iziston sog‘liqni saqlash vaziri COVID-19’ga qarshi kurashish doirasida hamkorlikda olib borilayotgan ishlarni ham alohida e’tirof etdi. O‘zbekiston delegatsiyasi nomidan so‘zga chiqqan sog‘liqni saqlash vazirining birinchi o‘rinbosari A.Inoyatov O‘zbekiston tomoni tibbiyot sohasidagi o‘zaro hamkorlikni yanada kengaytirishdan manfaatdorligini, shuningdek, butun dunyoga xavf solib turgan koronavirus infeksiyasiga qarshi Qirg‘iziston xalqi bilan birgalikda kurashishga tayyorligini bildirdi.
Avvalroq Qirg‘iziston prezidenti vazifasini bajaruvchi Talant Mamitov koronavirusga qarshi kurashda ko‘rsatgan yordami uchun O‘zbekiston tomoniga minnatdorlik bildirgani, O‘zbekiston Qirg‘izistonga yana 200 o‘ringa mo‘ljallangan tibbiyot konteynerlarini yetkazib bergani hamda O‘zbekiston Qirg‘izistonga ikki marta insonparvarlik yordamini jo‘natgani haqida xabar berilgandi.
Izoh (0)