Toshkent shahar hokimi Jahongir Ortiqxo‘jayev 19-dekabr kuni poytaxt hokimligida o‘tkazilgan matbuot anjumanida poytaxtda ko‘plab ko‘p qavatli yangi uylar qurilayotganiga qaramasdan uylarning narxi nega pasaymayotganiga izoh berdi, deb xabar bermoqda “Gazeta.uz”.
“Ko‘pchilik hamma yoq qurilish, qum va chang bo‘lib ketdi, deb norozi bo‘ldi. Agar bugungacha shaharda ommaviy qurilishlarni qilmaganimizda bugungi narxlar ham bo‘lmasdi. Biz 2,5—3 yil avval yaqin orada uylarning narxi 1 kvadrat metri [1500 dollar]dan kam bo‘lmasligini taxmin qilganmiz. Xabaringiz bo‘lsa, shaharda uylarni 2—3 ta kompaniya qurardi. Uylarni sotish ofislari bo‘lmas edi. Tanish topib, qaysidir ofisga borishingizga to‘g‘ri kelardi, u sizni kutib olib, tortmani ochib pulning 50 foizini qo‘yishni so‘rardi va uyni bitganda olishingizni aytardi”, — degan u. Hozir esa savdo ofislari paydo bo‘lgani, xizmat sifati oshib, 3 yil ichida bo‘lib to‘lash imkoniyati paydo bo‘lganini ta’kidlagan.
Matbuot anjumanida hokim uylarning narxi 1 kvadrat metri 1,5 million so‘mdan kam bo‘lmasligini prognozini qilganmiz deb aytgan. Biroq “Gazeta.uz”ning hokimlik matbuot xizmatiga bog‘lanib aniqlik kiritishicha, hokim aslida 1,5 ming dollar demoqchi bo‘lgan.
Mavzuga doir: Toshkent hokimi 2021-yil oxirigacha “snos”lar bo‘yicha barcha qarzlarni to‘lashga va’da berdi
Jahongir Ortiqxo‘jaev yuqorida aytib o‘tilganlarni inobatga olgan holda loyihalarni jadal amalga oshirish, shuningdek, zarur infratuzilmani shakllantirish zarurligini ta’kidlagan.
Iqtisodiy tadqiqotlar va islohotlar markazi tomonidan ko‘p qavatli uylarda 2019-yil martidan 2020-yil martigacha o‘tkazilgan uy-joy narxlari tahliliga ko‘ra, Toshkentdagi uylarning o‘rtacha kvadrat metri narxi ushbu davrda 639,4 dollarni tashkil etdi. Tumanlar bo‘yicha eng yuqori narx Yunusobod va Shayxontohur tumanlarida — mos ravishda 699 va 694 dollar bo‘lgan. Eng past narxlar Bektemir va Sergeli tumanlarida qayd etilgan — 405 va 411 dollar.
Oktabr oyida O‘zbekistonda 455 ta ko‘p qavatli bino avariya holatida ekanligi ma’lum qilingandi. 2021—2023-yillarda avariya holatidagi ko‘p qavatli uylar o‘rnida yangi uylar qurish rejalashtirilmoqda.
Izoh (0)