Ўзбекистон Соғлиқни сақлаш вазирининг биринчи ўринбосари А. Иноятов бошчилигидаги делегация Қирғизистонда бўлиб қайтди, дея хабар бермоқда Соғлиқни сақлаш вазирлиги.
Ўзбекистон делегацияси Боткен вилояти Қадамжай тумани Марказий туман касалхонасида бўлди. У ерда Қирғизистон соғлиқни сақлаш вазири Алимкадир Бейшеналиев ва Қирғизистон ҳукуматининг бошқа вакиллари иштирокида шифохонанинг очилиш маросими бўлиб ўтди.
Икки томонлама мулоқотлар давомида соғлиқни сақлаш соҳасидаги ўзаро ҳамкорлик алоқалари, шу жумладан, COVID-19’га қарши биргаликда курашиш масалалари муҳокама қилинди. Шунингдек, томонлар юқумли касалликларни даволаш, ташхислаш ва олдини олиш бўйича ўз тажрибалари билан ўртоқлашди.
Алимкадир Бейшеналиев юқумли касалликлар шифохонасининг қурилиши, унинг жиҳозланишида кўрсатилган амалий кўмак ва тақдим этилаётган гуманитар ёрдам учун Ўзбекистон томонига миннатдорчилик билдирди. Шунингдек, пандемия даврида молиявий имкониятлар ҳамда даволаш муассасаларида шифо ўринлари етишмаётган шундай мураккаб шароитда ўзбекистонликларнинг ушбу кўмаги юқори баҳоланишини айтиб ўтди.
Замонавий шифохона қурилиши ва жиҳозланиши тўлиқ Ўзбекистон томонидан молиялаштирилди ва қисқа муддатларда фойдаланишга топширилди. Муассаса зарур тиббий жиҳозлар ва мебеллар билан тўлиқ жиҳозланган бўлиб, беморлар учун барча шароитлар яратилган.
200 ўринли юқумли касалликлар шифохонасининг очилиш маросимида сўзга чиққанлар Шавкат Мирзиёевга ва ўзбек халқига миннатдорлик билдириб, ушбу ташаббус қирғиз–ўзбек халқлари орасидаги азалий дўстлик муносабатларини янада мустаҳкамлашини таъкидлашди.
Шунингдек, Қирғизистон соғлиқни сақлаш вазири COVID-19’га қарши курашиш доирасида ҳамкорликда олиб борилаётган ишларни ҳам алоҳида эътироф этди. Ўзбекистон делегацияси номидан сўзга чиққан соғлиқни сақлаш вазирининг биринчи ўринбосари А.Иноятов Ўзбекистон томони тиббиёт соҳасидаги ўзаро ҳамкорликни янада кенгайтиришдан манфаатдорлигини, шунингдек, бутун дунёга хавф солиб турган коронавирус инфекциясига қарши Қирғизистон халқи билан биргаликда курашишга тайёрлигини билдирди.
Аввалроқ Қирғизистон президенти вазифасини бажарувчи Талант Мамитов коронавирусга қарши курашда кўрсатган ёрдами учун Ўзбекистон томонига миннатдорлик билдиргани, Ўзбекистон Қирғизистонга яна 200 ўринга мўлжалланган тиббиёт контейнерларини етказиб бергани ҳамда Ўзбекистон Қирғизистонга икки марта инсонпарварлик ёрдамини жўнатгани ҳақида хабар берилганди.
Изоҳ (0)