O‘zbekiston Vazirlar Mahkamasi 17-dekabr kuni mamlakatning seysmik faol zonalarida joylashgan suv omborlarida uzluksiz instrumental seysmologik kuzatuvlar tizimini joriy etish to‘g‘risida qaror qabul qildi, deb xabar beradi Norma.
Seysmologik kuzatuvlar tizimi atrof-muhitni davlat tomonidan monitoring qilish kompleks tizimining ajralmas qismi hisoblanadi. U suv omborlarining seysmik holatiga ta’sir etuvchi omillarga oid ma’lumotlarni muntazam ravishda to‘plash, qayta ishlash va tahlil qilishni, shuningdek, tegishli tavsiyalarni ishlab chiqqan holda suv yig‘ish va chiqarish paytida hamda suv omboridan foydalanish paytida seysmik rejimdagi o‘zgarishlarni baholashni o‘z ichiga oladi.
Seysmologik kuzatuvlar tizimi doirasida, xususan, zilzilalar paytida suv omborlari, ularning to‘g‘onlari, qirg‘oq yonbag‘irlari, asosiy uchastkalar va suv o‘zanlari holati to‘g‘risida turli xil intensivlikdagi ma’lumotlar to‘planadi. Ushbu ma’lumotlarga asosida suv omborlari to‘g‘onlarining dinamik xususiyatlari o‘rganiladi va ularning kuchlanish-deformatsiyasi baholanadi. Hujjatda seysmologik kuzatuvlarni o‘tkazish uchun zarur bo‘lgan uskunalar va butlovchi qismlarni sotib olish nazarda tutilgan.
Suv xo‘jaligi vazirligi va “O‘zbekgidroenergo” korxonasi Fanlar akademiyasi hamda Favqulodda vaziyatlar vazirligi bilan birgalikda 2021-yil 1-martdan boshlab suv omborlarida uzluksiz instrumental seysmologik kuzatuvlar tizimini bosqichma-bosqich joriy etishni boshlashi kerak.
Eslatib o‘tamiz, iyul oxirida Shavkat Mirziyoyev “O‘zbekiston Respublikasi aholisi va hududining seysmik xavfsizligini ta’minlash tizimini tubdan takomillashtirish chora-tadbirlari to‘g‘risida”gi qarorni imzolagan edi. Qaror bilan seysmologiya, inshootlarning seysmik mustahkamligini va seysmik xavfsizlikni ta’minlash sohasidagi mas’ul davlat organlari belgilangan.
Izoh (0)