Buxoro viloyati Peshku tumanida yashovchi haydovchiga qo‘pol munosabatda bo‘lgan YPX inspektoriga nisbatan xizmat tekshiruvi tayinlandi, deya xabar berdi “Daryo” muxbiri Laylo Hayitova.
Ta’kidlanishicha, 2020-yilning 18-dekabr kuni Peshku tumanidagi “Kuyovxo‘ja” mahallasida yashovchi fuqaro Bobomurod Hamroyev YPX inspektori xatti-harakatidan norozi bo‘lib, o‘ziga nisbatan qo‘pol munosabatda bo‘lganidan shikoyat qilgan.
“Sog‘ligim yomonlashib, yuragimda xuruj boshlangani sababli boshqaruvimdagi avtomashinani to‘xtatishga majbur bo‘ldim va o‘sha zahoti ‘validol’ ichdim. Birozdan so‘ng harakatni davom ettirmoqchi edim, sal oldinroqda turgan YPX inspektori oldimga kelmay, menga hujjatlarimni unga olib borishimni aytib, do‘q-po‘pisa qildi”, — deydi Bobomurod Hamroyev.
Fuqaroga ko‘ra, u shu topda YPX inspektoridan “Nega mashinamning oldiga kelmadingiz?”, — deb so‘ragan. Inspektor esa “Sen qoidashunosmisan, menga o‘rgatasanmi, mashinangni qamayman!”, —deya baqirgan. U yonida yurgan odamlarni guvoh sifatida chaqirtirib, hujjat rasmiylashtirishga kirishgan. Shundan so‘ng Bobomurod Hamroyev yaqindagina infarkt bo‘lganini, sog‘ligi yaxshi emasligini aytib, nogironligini tasdiqlovchi hujjatni ko‘rsatishga majbur bo‘lgan.
“Nogiron bo‘lsang, nega mashina haydasan!” — deya do‘q qilgan YPX inspektori haydovchining hujjatlarini qaytarib bergan va holat bo‘yicha uning videotasvirga olishiga qarshilik ko‘rsatgan.
Shunga qaramasdan, fuqaro Bobomurod Hamroyev viloyat IIB Yo‘l harakati xavfsizligi boshqarmasi inspektorini telefoniga suratga tushirgan holda Facebook ijtimoiy tarmog‘idagi sahifasiga joylashtirgan va inspektor tomonidan unga nisbatan qo‘pol muomala qilinganligini bildirgan.
Buxoro viloyat IIB, YPXB axborot xizmati rahbari Ulug‘bek Shukrullayevning “Daryo”ga ma’lum qilishicha, haydovchiga qo‘pol munosabatda bo‘lgan YPX inspektori Jamshid Adizovga nisbatan xizmat tekshiruvi tayinlanib, voqea o‘rganila boshlangan.
“Mazkur holat yuzasidan o‘tkazilgan dastlabki o‘rganishlarga ko‘ra, viloyat IIB YHXB YPXO 1-safarbar guruhi YPX inspektori safdor Jamshid Adizov belgilangan yo‘nalish bo‘yicha Buxoro shahrida xizmat olib borgan. Inspektor fuqaro Bobomurod Hamroyev boshqaruvidagi kulrang Cobalt’ni to‘xtash taqiqlangan yo‘lda to‘xtagani sabab Yo‘l xarakati qoidalarining 91-bandi talablarini buzganligini bildirgan. Haydovchi inspektorga sog‘ligi yomonlashganligi sababli to‘xtashga majbur bo‘lganini tushuntirib, nogironligini tasdiqlovchi guvohnomasini ko‘rsatgan. Inspektor fuqaroga nisbatan ma’muriy bayonnoma rasmiylashtirmasdan, uni qo‘yib yuborgani ma’lum bo‘ldi”, — deydi Ulug‘bek Shukrullayev.
Izoh (0)