Qarshi tumani hokimi Maqsuda Mustafoyeva Zoir Mirzayev u bilan maslahatlashgandan keyingina takroriy murojaatnoma haqida e’lon qilganini aytdi

Qarshi tumani hokimi Maqsuda Mustafoyeva viloyat rahbari Zoir Mirzayev takroriy murojaatnoma bo‘lishi haqida u bilan gaplashganidan so‘nggina e’lon qilganini aytdi, deya xabar berdi “Daryo” muxbiri.

Ta’kidlanishicha, bu haqda Qarshi tumanida bo‘lib o‘tgan matbuot anjumanida ma’lum qilingan.

Murojaatnoma e’lon qilingan sessiya so‘ngida jurnalist va blogerlar bilan muloqot qilgan tuman hokimi Maqsuda Mustafoyeva “Daryo” muxbirining “Tumanda aholiga hokimsiz murojaatnoma yo‘llangani ijtimoiy tarmoqlarda shov-shuvlarga sabab bo‘lgach, sizdan takroriy murojaatnoma qilish tashabbusi chiqmadimi? Nega aynan viloyat rahbari Zoir Mirzayevning bu haqdagi tanqidini kutib turdingiz? Aslida, holat jamoatchilik orasida shov-shuvlarga sabab bo‘lgach, bu tashabbus sizdan chiqishi kerak emasmidi? Bugungi kun rahbarlari biror ish qilishi uchun Prezident tanqidini yoki viloyat rahbari tanqidini kutib turishi shartmi?”, degan savoliga murojaatnomani qayta o‘tkazish o‘zidan chiqqan tashabbus ekanligini aytdi.

“Tuman aholisiga hokimsiz murojaatnoma qilinishi internetda unchalik shov-shuv bo‘ladigan voqea emas. Qolaversa, takroriy murojaatnoma qilish o‘sha kuniyoq ‘bolnitsa’da yotganimda aytilgan. ‘Orgotdel’ bilan gaplashib, o‘sha kuniyoq agar qoniqishmasa, qayta murojaatnoma o‘tkazib berishimni aytganman. Siz o‘zingizcha, bu bilan shov-shuv yasadim, deyayotgan bo‘lsangiz, adashasiz. Chunki xalqning oldida hokimsiz murojaatnoma qilindi, degan gap u darajada qiziqtiradigan yoki ularning muammolarini yechib beradigan masala emas”, — dedi tuman hokimi.

Maqsuda Mustafoyeva viloyat hokimi Zoir Mirzayev takroriy murojaatnoma bo‘lishi haqida avval u bilan gaplashganidan so‘ng bu haqda e’lon qilganini aytmoqda.

“Viloyat hokimimiz bilan o‘sha kuni ko‘rishganimizda murojaatnoma qayta qabul qilinishi haqida aytilgandi, bundan o‘zlarining xabari bor edi. Shu sababli o‘sha kuni selektorda bu haqda aytdilar”, — dedi Maqsuda Mustafoyeva.

Eslatib o‘tamiz, 21-dekabr kuni Zoir Mirzayev rahbarligida o‘tkazilgan yig‘ilishda viloyat rahbari Qarshi tumanida aholiga hokimsiz murojaatnoma yo‘llanganini tanqid qilib, “Men bu holatni hazm qilolmayman”, degandi. Jurnalist va blogerlar bilan to‘g‘ridan to‘g‘ri muloqotga chiqolmay, o‘rniga o‘rinbosarlarini ro‘para qiladigan rahbarlarni “Bunday rahbarlar yo saviyasiz, yo savollarga javob berishdan qo‘rqadi”, deb aytgandi.