Бухоро вилояти Пешку туманида яшовчи ҳайдовчига қўпол муносабатда бўлган ЙПХ инспекторига нисбатан хизмат текшируви тайинланди, дея хабар берди «Дарё» мухбири Лайло Ҳайитова.
Таъкидланишича, 2020 йилнинг 18 декабрь куни Пешку туманидаги «Куёвхўжа» маҳалласида яшовчи фуқаро Бобомурод Ҳамроев ЙПХ инспектори хатти-ҳаракатидан норози бўлиб, ўзига нисбатан қўпол муносабатда бўлганидан шикоят қилган.
«Соғлигим ёмонлашиб, юрагимда хуруж бошлангани сабабли бошқарувимдаги автомашинани тўхтатишга мажбур бўлдим ва ўша заҳоти ‘валидол’ ичдим. Бироздан сўнг ҳаракатни давом эттирмоқчи эдим, сал олдинроқда турган ЙПХ инспектори олдимга келмай, менга ҳужжатларимни унга олиб боришимни айтиб, дўқ-пўписа қилди», — дейди Бобомурод Ҳамроев.
Фуқарога кўра, у шу топда ЙПХ инспекторидан «Нега машинамнинг олдига келмадингиз?», — деб сўраган. Инспектор эса «Сен қоидашуносмисан, менга ўргатасанми, машинангни қамайман!», —дея бақирган. У ёнида юрган одамларни гувоҳ сифатида чақиртириб, ҳужжат расмийлаштиришга киришган. Шундан сўнг Бобомурод Ҳамроев яқиндагина инфаркт бўлганини, соғлиги яхши эмаслигини айтиб, ногиронлигини тасдиқловчи ҳужжатни кўрсатишга мажбур бўлган.
«Ногирон бўлсанг, нега машина ҳайдасан!» — дея дўқ қилган ЙПХ инспектори ҳайдовчининг ҳужжатларини қайтариб берган ва ҳолат бўйича унинг видеотасвирга олишига қаршилик кўрсатган.
Шунга қарамасдан, фуқаро Бобомурод Ҳамроев вилоят ИИБ Йўл ҳаракати хавфсизлиги бошқармаси инспекторини телефонига суратга туширган ҳолда Facebook ижтимоий тармоғидаги саҳифасига жойлаштирган ва инспектор томонидан унга нисбатан қўпол муомала қилинганлигини билдирган.
Бухоро вилоят ИИБ, ЙПХБ ахборот хизмати раҳбари Улуғбек Шукруллаевнинг «Дарё»га маълум қилишича, ҳайдовчига қўпол муносабатда бўлган ЙПХ инспектори Жамшид Адизовга нисбатан хизмат текшируви тайинланиб, воқеа ўрганила бошланган.
«Мазкур ҳолат юзасидан ўтказилган дастлабки ўрганишларга кўра, вилоят ИИБ ЙҲХБ ЙПХО 1-сафарбар гуруҳи ЙПХ инспектори сафдор Жамшид Адизов белгиланган йўналиш бўйича Бухоро шаҳрида хизмат олиб борган. Инспектор фуқаро Бобомурод Ҳамроев бошқарувидаги кул ранг Cobalt’ни тўхташ тақиқланган йўлда тўхтагани сабаб Йўл харакати қоидаларининг 91-банди талабларини бузганлигини билдирган. Ҳайдовчи инспекторга соғлиги ёмонлашганлиги сабабли тўхташга мажбур бўлганини тушунтириб, ногиронлигини тасдиқловчи гувоҳномасини кўрсатган. Инспектор фуқарога нисбатан маъмурий баённома расмийлаштирмасдан, уни қўйиб юборгани маълум бўлди», — дейди Улуғбек Шукруллаев.
Изоҳ (0)