Navoiy viloyati Zarafshon shahrida ikki mast fuqaro o‘rtasida kelib chiqqan janjal ulardan birining o‘limi bilan yakunlandi, deya xabar qilmoqda Tergov departamenti.
Ma’lum qilinishicha, 2020-yilning 13-dekabr kuni soat 10:00 da Zarafshon shahar 1-kichik tuman 1-uy oldidagi daraxtzorda 45 yoshli Mannon Q.ning murdasi tashqi tan jarohatlarsiz topilgan.
Sud-tibbiy ekspertiza xulosasiga ko‘ra, Mannon Q.ning tanasida qorin bo‘shlig‘ining yopiq qo‘shma jarohati, to‘sh suyagini yopiq sinishi, ichak tutqich arteriyasi yorilishi kabi tan jarohatlari borligi hamda aynan shu jarohatlar uning o‘limiga sabab bo‘lganligi aniqlangan.
Mazkur holat yuzasidan Zarafshon shahar IIB huzuridagi Tergov bo‘linmasi tomonidan noma’lum shaxsga nisbatan Jinoyat kodeksining 104-moddasi 3-qismi “d” bandi (odam o‘limiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan.
Dastlabki tergov jarayonida mazkur jinoyatni 41 yoshli Tomdi tumanida tug‘ilgan Seriqbol S. sodir etganligi, janjalga esa har ikki fuqaroning spirtli ichimlik ta’sirida bir-birlarini so‘kib, haqorat qilganlari sabab bo‘lgani aniqlangan. Seriqbol S. jinoyat ishi bo‘yicha ayblanuvchi tariqasida ishda ishtirok etishga jalb qilinib, unga nisbatan qamoqqa olish tarzidagi ehtiyot chorasi qo‘llanilgan.
Avvalroq Qoraqalpog‘istonda 79 yoshli ayol va uning nabirasini o‘ldirgan shaxs hibsga olingani, “Malika”da ikki yigitning janjali pichoqbozlik bilan tugagani hamda Andijonda mast fuqaroni bolta bilan urib o‘ldirgan shaxs 17 yarim yilga qamalgani haqida xabar berilgandi.
Izoh (0)