Birlashgan Millatlar Tashkiloti homiyligida tashkil etilgan Orolbo‘yi mintaqasidagi Inson xavfsizligini ta’minlash bo‘yicha Ko‘psheriklik trast jamg‘armasi boshqaruv kengashining takliflari bo‘yicha ikkinchi chaqiriq doirasida umumiy qiymati 6 million AQSh dollaridan ziyod uchta loyihani moliyalashtirish ma’qullandi, deb xabar berdi “Gazeta.uz”.
“COVID-19 pandemiyasi davrida va undan tashqarida o‘spirinlarning salomatligi, oziqlanishi, suv ta’minoti, sanitariya holati, gigiyenasi va farovonligini yaxshilash hamda yoshlarning salohiyatini mustahkamlash orqali Qoraqalpog‘istonning barqaror kelajagiga sarmoya kiritish” deb nomlangan birinchi loyiha BMTning Bolalar jamg‘armasi (YuNISEF), Giyohvandlik va jinoyatchilik bo‘yicha boshqarmasi hamda Aholishunoslik jamg‘armasi tomonidan birgalikda amalga oshiriladi.
Loyiha aholining ijtimoiy himoyaga muhtoj qatlami, shu jumladan 5000 ta bola va o‘spirinlarning sog‘lig‘i hamda ovqatlanishini yaxshilashga qaratilgan. Shuningdek, loyiha doirasida 10-17 yoshli 10 ming nafar qiz mikroelementlar bilan ta’minlanadi. Qoraqalpog‘istonning uchta tumani – Mo‘ynoq, Qo‘ng‘irot va Bo‘zatovdagi 15 ta maktabda sog‘liqni saqlash infratuzilmasi yaxshilanadi.
Loyiha har yili 181,2 mingdan ziyod odamni qamrab oladi. Xususan, 20 ta birlamchi tibbiy-profilaktika muassasalari suv ta’minoti infratuzilmasi va sanitariya inshootlarini yaxshilanadi. Bundan tashqari, 520 nafar yoshlar malaka oshirish dasturlari orqali bilim va imkoniyatlarini kengaytiradi va o‘z mahallalari hayotiga jalb qilinadi.
“Orolbo‘yi mintaqasidagi aholining iqtisodiy hamda oziq-ovqat xavfsizligini hal qilish uchun moslashuvchan salohiyatini rivojlantirish orqali yoshlar hamda aholining yordamga muhtoj qatlamining ijodiy va innovatsion salohiyatini targ‘ib qilish” deb nomlangan ikkinchi loyihasi Birlashgan Millatlar Tashkilotining Taraqqiyot dasturi, Giyohvandlik va jinoyatchilik bo‘yicha boshqarmasi va Oziq-ovqat va qishloq xo‘jaligi tashkiloti tomonidan amalga oshiriladi.
Dastur 1472 dan ortiq qishloq yoshlari va ayollarni qamrab oladi. Xususan, boshlang‘ich loyihalar talabalar o‘rtasida targ‘ib qilinadi, 120 kishi biznes imtiyozlaridan foydalanadi. Bundan tashqari, dastur 300 ayol va yoshlarga yangi qishloq xo‘jaligi amaliyotlarini qo‘llash, qishloq xo‘jaligi kooperativlari va 9 ta namoyish maydonchalarini yaratish orqali 75 nafar yoshlarni ish bilan ta’minlash imkoniyatlarini yaratishga imkon beradi. Shu bilan birga, 120 nafar talaba va 300 nafar yoshlar raqamlashtirishga oid tashabbuslar, platformalar va ijtimoiy infratuzilma loyihalari orqali AKT sohasidagi o‘zlarining professional salohiyatini oshiradi.
“Qoraqalpog‘istonda sog‘liqni saqlash va xavfsizlikni universal qamrab olish yo‘lida” deb nomlangan uchinchi loyiha esa Jahon sog‘liqni saqlash tashkiloti (JSST) hamda Sog‘liqni saqlash vazirligi bilan hamkorlikda amalga oshiriladi. Loyiha Mo‘ynoq tumani aholisining tibbiyot muassasalariga, tibbiy asbob-uskunalarga va sog‘liqni saqlash ishchilariga bo‘lgan ehtiyojlarini kelgusidagi sarmoyalar to‘g‘risida ma’lumot berish uchun baholaydi.
Sog‘liqni saqlash sohasiga kiritilgan ushbu sarmoyalar mintaqadagi inson xavfsizligi, shu jumladan, suv, energetika va yo‘l infratuzilmasini hisobga oladi.
Orolbo‘yi mintaqasidagi loyihalar 2020-yildan 2023-yilgacha amalga oshiriladi. BMTning Inson xavfsizligi bo‘yicha Ko‘psheriklik trast fondiga O‘zbekiston hukumati, Yevropa Ittifoqi, Finlyandiya, Norvegiya va Janubiy Koreya donorlik qiladi.
Avvalroq hukumat qarori bilan Orol dengizi va Orolbo‘yi hududlarida o‘rmonzor barpo etiladigan maydon belgilangani hamda Shavkat Mirziyoyev Orolbo‘yi mintaqasini ekologik innovatsiya va texnologiyalar hududi deb e’lon qilish haqida BMT rezolyutsiyasini qabul qilishni taklif etgani haqida xabar berilgandi.