AQShda so‘nggi bir kecha-kunduzda COVID-19’ga chalinish bilan bog‘liq 400 mingdan ortiq holat qayd etildi, deb yozadi “RBK” AQSh kasallilar nazorati va profilaktikasi markaziga (CDC) tayanib.
Bungacha sutkalik kasallanishlar soni 11-dekabr kuni rekord darajada o‘sgan edi, o‘shanda, CDC ma’lumotlariga ko‘ra, 244 ming kishida koronavirus tasdiqlangan edi. Bir kun avval esa 230 mingta kasallanish holati qayd etilgan edi.
Ko‘rsatkichning keskin o‘sishi shu bilan bog‘liqki, markaz Texas shtatidan kelib tushayotgan yangi ma’lumotlarni hisobga olishni boshlagan. Texas ehtimoliy kasallanish holatlari haqidagi axborotni taqdim etishni boshlagan, natijada statistikaga 171 mingta ehtimoliy kasallanishlar kiritilgan. Ya’ni shtat hukumati o‘z ma’lumotlarida nafaqat tasdiqlangan (13 253), balki ehtimoliy (171 505) kasallanish holatlarini ham ko‘rsata boshladi. Texasdan kelib tushgan yangi ma’lumotlar hisobga olinmaganida, umumiy ko‘rsatkich bir kecha-kunduzda 231 mingtaga ko‘paygan bo‘lardi, deyiladi CDC xabarida.
AQShda jami 17,39 million kishi koronavirusni yuqtirib olgan, ularning 312 ming nafari vafot etgan. Jons Hopkins universiteti ma’lumotlariga qaraganda, mamlakat koronavirusga chalinish holatlari soni bo‘yicha dunyoda birinchi o‘rinni egallab turibdi. Butun dunyo bo‘yicha esa, Jons Hopkins universiteti ma’lumotlari bo‘yicha, 76 milliondan ortiq kishi kasallangan, 1,67 million nafari vafot etgan.
Eslatib o‘tamiz, AQShda 14-dekabr kuni koronavirusga qarshi emlash boshlandi. Birinchi navbatda kasallanganlar bilan ishlayotgan tibbiyot xodimlari emlanmoqda. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda. Hozir mamlakatda ikkita vaksina foydalanish uchun ma’qullangan, bular — Pfizer va BioNTech hamda Moderna vaksinalari. 18-dekabr holatiga AQShda 128 mingdan ortiq odam emlangan.
Izoh (0)