АҚШда сўнгги бир кеча-кундузда COVID-19’га чалиниш билан боғлиқ 400 мингдан ортиқ ҳолат қайд этилди, деб ёзади «РБК» АҚШ касаллилар назорати ва профилактикаси марказига (CДC) таяниб.
Бунгача суткалик касалланишлар сони 11 декабрь куни рекорд даражада ўсган эди, ўшанда, CДC маълумотларига кўра, 244 минг кишида коронавирус тасдиқланган эди. Бир кун аввал эса 230 мингта касалланиш ҳолати қайд этилган эди.
Кўрсаткичнинг кескин ўсиши шу билан боғлиқки, марказ Техас штатидан келиб тушаётган янги маълумотларни ҳисобга олишни бошлаган. Техас эҳтимолий касалланиш ҳолатлари ҳақидаги ахборотни тақдим этишни бошлаган, натижада статистикага 171 мингта эҳтимолий касалланишлар киритилган. Яъни штат ҳукумати ўз маълумотларида нафақат тасдиқланган (13 253), балки эҳтимолий (171 505) касалланиш ҳолатларини ҳам кўрсата бошлади. Техасдан келиб тушган янги маълумотлар ҳисобга олинмаганида, умумий кўрсаткич бир кеча-кундузда 231 мингтага кўпайган бўларди, дейилади CДC хабарида.
АҚШда жами 17,39 миллион киши коронавирусни юқтириб олган, уларнинг 312 минг нафари вафот этган. Жонс Ҳопкинс университети маълумотларига қараганда, мамлакат коронавирусга чалиниш ҳолатлари сони бўйича дунёда биринчи ўринни эгаллаб турибди. Бутун дунё бўйича эса, Жонс Ҳопкинс университети маълумотлари бўйича, 76 миллиондан ортиқ киши касалланган, 1,67 миллион нафари вафот этган.
Эслатиб ўтамиз, АҚШда 14 декабрь куни коронавирусга қарши эмлаш бошланди. Биринчи навбатда касалланганлар билан ишлаётган тиббиёт ходимлари эмланмоқда. Касалликлар назорати ва профилактикаси марказлари (CДC) маълумотларига кўра, 2020 йил охиригача Америка ҳукумати 40 миллион кишини эмлашни режалаштирмоқда. Ҳозир мамлакатда иккита вакцина фойдаланиш учун маъқулланган, булар — Pfizer ва BioNTech ҳамда Moderna вакциналари. 18 декабрь ҳолатига АҚШда 128 мингдан ортиқ одам эмланган.
Изоҳ (0)