AQShning kamida uchta shtati rossiyalik xakerlar tomonidan kiberhujumga uchragan, buning natijasida AQShning bir nechta federal idoralari jabrlangan. Bu haqda Bloomberg agentligi tekshiruvning borishidan xabardor bo‘lgan manbalariga tayanib xabar berdi, deb yozadi Meduza. Gap qaysi shtatlar haqida borayotganiga aniqlik kiritilmadi.
AQSh kiberxavfsizlik agentligi 17-dekabr kuni ma’lum qilishicha, xakerlar o‘z hujumini murakkab hamda chuqur bilimni talab etuvchi sxema bo‘yicha amalga oshirgan. Agentlik ma’lumotlariga ko‘ra, xakerlar hujum uchun SolarWinds platformasidan, shuningdek, boshqa kirish nuqtalaridan foydalangan, ularni idorada oshkor qilishmadi.
AQShning saylangan prezidenti Jo Bayden shu kuniyoq xakerlik hujumi potensial ravishda “minglab qurbonlarga, shu jumladan, Amerika kompaniyalari va davlat federal organlariga” daxl qilgan bo‘lishi mumkinligini aytdi. Baydenning ta’kidlashicha, kiberxavfsizlik uning ma’muriyati oldidagi birlamchi vazifalardan biriga aylanadi.
Avvalroq The Washington Post gazetasi kiberhujum ortida Rossiya maxsus xizmatlari bilan bog‘lashadigan Cozy Bear (APT29 sifatida ham taniqli) guruhi turganini xabar qilgandi. Xususan, Pentagon, Davlat departamenti, Moliya vazirligi va savdo vazirligi hujum nishoni bo‘lgan.
Izoh (0)