AQShning Tennessi shtatidagi CHI Memorial shifoxonasida 17-dekabr kuni hamshira koronavirusga qarshi emlashdan keyingi matbuot anjumani vaqtida hushidan ketib qoldi. Bu haqda “Korrespondent.net” xabar berdi.
Tennessida CHI Memorial shifoxonasining xodimlarida Pfizer kompaniyasining vaksinasi bilan birinchi emlash amalga oshirildi. Matbuot anjumani vaqtida hamshira Tiffani Dover hushidan ketib qoldi.
COVID-19’ga qarshi vaksina qabul qilinganidan, taxminan, 17 daqiqa o‘tgach, hamshira bosh aylanishini his qilgan, uzr so‘ragan va hushini yo‘qotgan.
https://twitter.com/Breaking911/status/1339779233372123137
“Men o‘zimni biroz yomon his qildim, biroq endi yaxshiman, qo‘limdagi og‘riq ham o‘tib ketdi”, — deya ma’lum qilgan hamshira keyinroq.
Hamshira biroz vaqtdan keyin jurnalistlar bilan yana gaplashgan hamda og‘riqni his qilganda tez-tez hushdan ketishini va bu uning uchun odatiy holat ekanini aytgan.
CHI Memorial shifokorlarining ma’lum qilishicha, hamshiraning hushidan ketishi vaksina bilan bog‘liq bo‘lmagan. Kasalliklar nazorati markazi ham hushdan ketish barcha emlash turlari uchun kamyob hodisa emasligini va ko‘pincha bezovtalik yoki og‘riq natijasida yuz berishini bildirgan.
Izoh (0)