“Rospotrebnadzor” rahbari bahorda COVID-19 pandemiyasi tugashini taxmin qildi

Koronavirus pandemiyasi bahorgacha tugaydi, deb taxmin qilmoqda “Rospotrebnadzor” rahbari Anna Popova. Bu haqda “Interfaks” ma’lum qildi.

“Pandemiya bahorga qadar tugaydi. Agar biz harakat qilsak, undan ham avval tugashi mumkin. Bu hammamizga bog‘liq”, – dedi u “Rossiya 1” telekanalida.

Popova, shuningdek, koronavirusga chalinganlarda antitanalar mavjud bo‘lsa, ularni emlash shart emasligini ta’kidladi.

“Bugungi kunda emlashdan oldin odatda antitanalarning mavjudligini tekshirib ko‘ramiz, agar antitanalar bo‘lsa, emlash shart emas”, – dedi Popova.

Ma’lumot uchun, pandemiya boshlanganidan beri mamlakatda koronavirusga chalinganlarning umumiy soni 2 million 819 ming 429 kishiga yetdi. Bemorlarning jami 2 million 254 ming 742 nafari kasallikdan tuzaldi.

Eslatib o‘tamiz, 2-dekabrda Putin Rossiyada koronavirusga qarshi keng ko‘lamli emlashni boshlashni buyurgandi. Moskvada emlash markazlari 5-dekabrdan ish boshladi, 17-dekabrga qadar, Moskva meri Sergey Sobyaninning so‘zlariga ko‘ra, 15 mingga yaqin kishi emlandi. Sergey Sobyanin shahar aholisining 7 million nafari COVID-19’ga qarshi emlanishi kerakligini aytgandi.

Vaksinani qabul qilish imkoniyatiga dastlab ta’lim, sog‘liqni saqlash va ijtimoiy soha xodimlari ega bo‘lgandi. 14-dekabrdan COVID-19’ga qarshi vaksina olishi mumkin bo‘lganlar ro‘yxati kengaytirildi. Dekabr oyi o‘rtalarida Rossiyaning barcha hududlarida koronavirusga qarshi emlash boshlandi.

Avvalroq dunyoda koronavirusga chalinganlar soni 74 million kishidan oshgani haqida xabar berilgandi.