Yevroittifoq kengashi epidemik vaziyat yetarlicha yaxshilangan qaysi mamlakat fuqarolari Yevroittifoq hududiga kira olishini ma’lum qildi. Bu haqda “Kommersant” xabar bermoqda.
Yevroittifoq hududiga oldingidek, Avstraliya, Yangi Zelandiya, Ruanda, Singapur, Tailand, Janubiy Koreya va Yaponiyadan borish mumkin. “Xitoy, Gonkong va Makaoning alohida ma’muriy tumanlari uchun ham Yevroittifoqqa safar qilish bo‘yicha cheklovlar asta-sekinlik bilan bekor qilinishi kerak, agar bu ikki taraflama bo‘lsagina”, — deyiladi bayonotda. Urugvayda koronavirus bilan bog‘liq vaziyat yomonlashgani tufayli u yerdan Yevroittifoqqa kelish uchun ruxsat bekor qilindi.
Yevropada pandemiya boshidan buyon 22,9 million kishi koronavirusga chalingan. So‘nggi bir hafta ichida virusni yuqtirish bilan bog‘liq 1,7 millionta holat qayd etildi. Butun pandemiya davrida 506 ming kishi koronavirus oqibatida vafot etdi.
Avvalroq Jahon sog‘liqni saqlash tashkiloti (JSST)ning Yevropa byurosi koronavirus infeksiyasi pandemiyasi munosabati bilan Yevropa aholisiga Rojdestvo va Yangi yilni kutib olish uchun iloji boricha ko‘chada to‘planishni tavsiya etgan edi.
Bir qator Yevropa mamlakatlari Rojdestvo va Yangi yil bayramlari kuni ham amalda bo‘ladigan cheklovlarni joriy qilmoqda. Xususan, 16-dekabr kunidan Buyuk Britaniya poytaxtida COVID-19 koronavirus infeksiyasi tarqalishi munosabati bilan cheklov choralarining uchinchi — eng yuqori darajasi amal qilishni boshladi. Germaniyada koronavirus bilan bog‘liq og‘ir vaziyat tufayli 16-dekabrdan boshlab kamida 10-yanvarga qadar davom etuvchi qat’iy lokdaun joriy etildi. Fransiya bosh vaziri Jan Kasteks esa mamlakatda 15-dekabrdan komendantlik soatini e’lon qildi, u soat 20:00 dan soat 06:00 gacha amal qiladi. Komendantlik soati Yangi yil kechasi ham kuchda bo‘ladi.
Izoh (0)