Shvetsiya qiroli Karl XVI Gustav mamlakatning koronavirusga qarshi kurash yo‘li muvaffaqiyatsiz bo‘lganini tan oldi, deb xabar bermoqda Meduza. Uning so‘zlari Financial Times tomonidan keltirilgan.
“Menimcha, biz muvaffaqiyatsizlikka uchradik. Bizda vafot etganlar ko‘p bo‘ldi va bu dahshatli”, — dedi Karl Gustav shvedlarga qarata murojaatida.
Uning aytishicha, keskin choralar ko‘rishdan voz kechish Shvetsiyada qo‘shni mamlakatlarga qaraganda infeksiyadan o‘limlar sonining ko‘p bo‘lishiga olib keldi.
Shvetsiya boshqa mamlakatlardan farqli ravishda COVID-19 epidemiyasi avjida keskin karantin joriy etmagandi. Xususan, mamlakatda maktablar, restoranlar va sport zallari yopilmadi.
Jons Hopkins universiteti ma’lumotlariga ko‘ra, 17-dekabr holatiga ko‘ra, Shvetsiyada 357,5 ming kishi koronavirusga chalingani qayd etilgan. Epidemiya davrida 9893 kishi vafot etgan.
Taqqoslash uchun, Daniyada 124 ming kishida COVID-19 aniqlangan, rasmiy ma’lumotlarga ko‘ra 992 kishi vafot etgan. Norvegiyada kasallanish bo‘yicha 42,3 ta holat aniqlangan, ularning 402 tasi o‘lim bilan yakunlangan.
Avvalroq Shvetsiya bosh vaziri mamlakat rasmiylari COVID-19 tahdidini past baholaganini tan olgani haqida xabar berilgan edi. Mamlakat bosh epidemiologi Anders Tegnell karantindan voz kechilgani sababli mamlakatda juda ko‘p odam vafot etganini tan olgan va buni xato deb atagandi.
Mavzuga doir: Shvetsiyada qat’iy karantin joriy qilinadi
Izoh (0)