Евроиттифоқ кенгаши эпидемик вазият етарлича яхшиланган қайси мамлакат фуқаролари Евроиттифоқ ҳудудига кира олишини маълум қилди. Бу ҳақда «Коммерсантъ» хабар бермоқда.
Евроиттифоқ ҳудудига олдингидек, Австралия, Янги Зеландия, Руанда, Сингапур, Таиланд, Жанубий Корея ва Япониядан бориш мумкин. «Хитой, Гонконг ва Макаонинг алоҳида маъмурий туманлари учун ҳам Евроиттифоққа сафар қилиш бўйича чекловлар аста-секинлик билан бекор қилиниши керак, агар бу икки тарафлама бўлсагина», — дейилади баёнотда. Уругвайда коронавирус билан боғлиқ вазият ёмонлашгани туфайли у ердан Евроиттифоққа келиш учун рухсат бекор қилинди.
Европада пандемия бошидан буён 22,9 миллион киши коронавирусга чалинган. Сўнгги бир ҳафта ичида вирусни юқтириш билан боғлиқ 1,7 миллионта ҳолат қайд этилди. Бутун пандемия даврида 506 минг киши коронавирус оқибатида вафот этди.
Аввалроқ Жаҳон соғлиқни сақлаш ташкилоти (ЖССТ)нинг Европа бюроси коронавирус инфекцияси пандемияси муносабати билан Европа аҳолисига Рождество ва Янги йилни кутиб олиш учун иложи борича кўчада тўпланишни тавсия этган эди.
Бир қатор Европа мамлакатлари Рождество ва Янги йил байрамлари куни ҳам амалда бўладиган чекловларни жорий қилмоқда. Хусусан, 16 декабрь кунидан Буюк Британия пойтахтида COVID-19 коронавирус инфекцияси тарқалиши муносабати билан чеклов чораларининг учинчи — энг юқори даражаси амал қилишни бошлади. Германияда коронавирус билан боғлиқ оғир вазият туфайли 16 декабрдан бошлаб камида 10 январга қадар давом этувчи қатъий локдаун жорий этилди. Франция бош вазири Жан Кастекс эса мамлакатда 15 декабрдан комендантлик соатини эълон қилди, у соат 20:00 дан соат 06:00 гача амал қилади. Комендантлик соати Янги йил кечаси ҳам кучда бўлади.
Изоҳ (0)