AQShda FDA ekspertlari Moderna vaksinasini ma’qullashni tavsiya qildi

AQSh Oziq-ovqatlar va dorilar sifati bo‘yicha boshqarmasi (FDA) ekspertlari boshqarmaga Amerikaning Moderna kompaniyasi tomonidan ishlab chiqarilgan koronavirusga qarshi vaksinani ma’qullashni tavsiya etdi. Bu haqda “RBK” xabar bermoqda.

FDA ekspertlari xulosasiga ko‘ra, Moderna vaksinasining afzalliklari uning kamchiliklaridan ustun keladi. Dori COVID-19’ga nisbatan 94 foizlik himoyani ta’minlashga qodir.

12-dekabr kuni AQSh Oziq-ovqat mahsulotlari va dori vositalarini nazorat qilish boshqarmasi (FDA) Pfizer va BioNTech kompaniyalari tomonidan yaratilgan koronavirusga qarshi vaksinalardan foydalanishga ruxsat berdi. Bu AQShda ma’qullangan birinchi vaksina bo‘ldi.

AQSh prezidenti Donald Tramp vaksinaning birinchi dozasini yuborish ishlari “24 soatdan kamroq vaqt ichida” amalga oshirilishini ma’lum qildi.

Keyinroq Oq uy qoshidagi Milliy xavfsizlik kengashi matbuot xizmati vakili Jon Elliot AQShda COVID-19 koronavirus infeksiyasiga qarshi vaksina bilan birinchi navbatda emlanadiganlar guruhiga yuqori darajali mansabdorlar, shu jumladan, Oq uyning ba’zi vakillari ham kirishini ma’lum qildi.

Ammo Donald Tramp o‘z Twitter’ida hozircha COVID-19’ga qarshi vaksina olishni rejalashtirmayotganini ma’lum qildi. “Oq uyda ishlaydigan odamlar vaksinatsiya dasturi doirasida sal keyinroq emlanishi kerak, agar bunga alohida ehtiyoj bo‘lmasa. Men shunday tuzatish kiritishni so‘radim”, — deb yozdi Amerika yetakchisi. Tramp aniqlik kiritishicha, uning o‘zi hozircha vaksina olmaydi, ammo vaqti kelganida emlanish imkoniyatini “intiqlik bilan kutadi”.

AQShda 14-dekabr kuni koronavirusga qarshi emlash boshlandi. Kasalliklar nazorati va profilaktikasi markazlari (CDC) ma’lumotlariga ko‘ra, 2020-yil oxirigacha Amerika hukumati 40 million kishini emlashni rejalashtirmoqda.

1-dekabr kuni Moderna AQSh Oziq-ovqat mahsulotlari va dori vositalarining Sanitar nazorati boshqarmasiga (FDA) koronavirus vaksinasidan favqulodda foydalanish uchun ariza yuborganini e’lon qilgandi. Avvalroq uning samaradorligi dastlabki tahlilda 94,1 foiz, kasallikning og‘ir shaklida esa 100 foiz samaradorlik ko‘rsatgani ma’lum qilingandi.

Shu paytgacha AQShda 17,1 million kishi koronavirusga chalingan, 310,4 mingdan ortiq odam vafot etgan. AQSh kasallanganlar va o‘lim holatlari soni bo‘yicha hamon yetakchilik qilmoqda.