Ispaniyada rus mafiyasiga oid ish bo‘yicha qo‘lga olingan rossiyaliklarning ism-shariflari oshkor qilindi

Ispaniya politsiyasi rus mafiyasining pullarini “yuvish” ishi bo‘yicha bir nechta rossiyalik biznesmenni qo‘lga olgan. Ular orasida tadbirkor Aleksey Shirokov (yoki Sirokov) ham bor, deb yozadi Meduza Ispaniyaning El Pais va ABC gazetalariga tayanib.

Nashrlarning ta’riflashicha, Shirokov turli noqonuniy yuridik xizmatlarni ko‘rsatgan, masalan, u Ispaniyada istiqomat uchun guvohnoma olish jarayonini soddalashtirishga yordam bergan.

Shirokov bilan birgalikda yana 22 kishi qo‘lga olingan, bular rossiyalik biznesmenlar, ularning maslahatchilari va biznes-sheriklari, shuningdek, ispaniyalik mansabdorlar, ikki politsiyachi va huquqshunoslardir.

ABC gazetasi rus mafiyasining pullarini “yuvish”ga aloqador bo‘lgan yana to‘rt rossiyalikning familiyalarini keltirib o‘tdi. Bular, nashr ma’lumotlariga ko‘ra, jinoiy guruhga yangi a’zolarni jalb qilish va ispaniyalik biznesmenlar bilan muzokaralarda vositachilik qilgan Mityurev; “pul yuvish” uchun mas’ul bo‘lgan Xakimov va Jijin; mafiya bilan to‘g‘ridan to‘g‘ri muloqot qilgan Danilov. Danilov jinoiy ishning asosiy figurantlaridan biri bo‘lib, u hozircha qo‘lga olinmagan.

Ispaniya politsiyasi Yevropol bilan birgalikda 16-dekabr kuni rus mafiyasining jinoiy faoliyatdan olingan daromadlarini “yuvish”da gumon qilib, 23 kishini qo‘lga oldi. Ular orasida 8 nafar Rossiya fuqarosi, ikki ukrainalik, Qozog‘iston va Jazoirdan bir nafardan fuqaro hamda 11 nafar ispaniyalik bor. Tintuvlarda politsiya qurol-yarog‘, 300 ming yevro naqd pul, brilliantlar, 16 ta qimmatbaho avtomobil va kriptovalyuta hisoblarini topgan. Shuningdek, bank hisoblari va millionlab yevro qiymatga ega aktivlar politsiya tomonidan xatlangan.

2018-yil oktabrida Ispaniyada Tambov—Malishev tashkiliy jinoyatchilik guruhi a’zolari deb hisoblanilgan, asosan Rossiya fuqarolaridan iborat 17 kishi oqlangan edi. Ular Ispaniyadagi kompaniyalar va ko‘chmas mulklar orqali “pul yuvish”da ayblangan edi. Ispaniya milliy sud hay’ati prokuratura sudlanuvchilar ushbu tashkiliy jinoyatchilik guruhiga aloqador ekanligi yoki “pul yuvish” orqali unga yordam bergani yuzasidan yetarlicha dalil taqdim etilmagan deb hisobladi. Ish bo‘yicha oqlanganlar orasida Rossiya Davlat dumasi deputati Vladislav Reznik ham bo‘lgan.