Sirdaryoda o‘z raqobatchisini o‘ldirish uchun 5 ming dollarga qotil yollagan 26 yoshli tadbirkor qo‘lga olingani to‘g‘risida xabar berilgandi. Mahalliy televideniyeda qotillik buyurtma qilgan jinoyatchi bo‘yicha lavha namoyish etilgan bo‘lib, unda buyurtmachi tomonidan yollangan shaxsga yo‘llangan audioyozuv ham keltirilgan.
Ma’lumotlarga ko‘ra, 7-dekabr kuni shaxsini sir saqlashni so‘ragan X. ismli fuqaro ariza bilan murojaat qilib, tanishi tadbirkor J.Z. uni o‘ziga raqobatchi deb bilgan boshqa bir tadbirkorni o‘ldirishga buyurtma qilib, evaziga 5 ming AQSh dollari berishni va’da qilgan. 10-dekabr kuni Sirdaryo viloyati prokuraturasi tomonidan boshqa huquqni muhofaza qiluvchi organlar bilan hamkorlikda o‘tkazilgan tezkor tadbirda X. ismli shaxs Guliston shahrida joylashgan qabriston yaqinida tadbirkorni qotillik alomatlari bilan yotgan, yuz va bosh qismi grim qilingan jasadi va uni vafot etgani sun’iy ravishda yaratilgan fotosuratini ko‘rsatgan. Buyurtmachi tadbirkor J.Z. Mirzaobod tumani “Bog‘iston” mahallasi hududida unga 4 ming dollarni bergan vaqtida ushlangan.
Videolavhada qotillikni buyurtma qilgan shaxsning talablari yozib olingan audio ham e’lon qilingan.
“Konkret yo‘q qilish kerak. Shunday telefon qilish kerak, qayerdasan, kel shu yerga, deyish kerak... Murdani ko‘rish kerak, bo‘ldi. Pulini beraman. Murdani ko‘ramiz, bo‘ldi, chiqib ketamiz.
Yo‘limizdan chiqqan odamni yo‘q qilamiz, boshqa iloji yo‘q. Shunda kattalar ham tan beradi. O‘ldirsangiz ham organ nima qiladi? Huhh deb (yengil) nafas oladi, bitta haromi kamaydi, deb. Mana ‘tanga’si, aka. O‘likni shunday ko‘raman, bo‘ldi, men xursand bo‘laman”, — deyiladi audioda.
Voqeadan xabardor bo‘lganlardan biri ijtimoiy tarmoqda yozishicha, qotillikni buyurtma qilgan shaxs Sirdaryo viloyatidagi bog‘chalarga oziq-ovqat ta’minoti bilan shug‘ullanuvchi tadbirkor bo‘lgan. U o‘ldirishni istagan shaxs esa to‘g‘ridan to‘g‘ri raqobatchisi bo‘lgani aytilmoqda.
Holat yuzasidan Sirdaryo viloyati prokuraturasi tomonidan J.Z.ga nisbatan Jinoyat kodeksining 25 va 97-moddasi 1-qismi (qasddan odam o‘ldirishga suiqasd qilish) bilan jinoyat ishi qo‘zg‘atilgan. Bu jinoyatni sodir etganligi isbotlangan shaxs 10 yildan 15 yilgacha ozodlikdan mahrum qilinishi mumkin.
Izoh (0)