Сирдарёда ўз рақобатчисини ўлдириш учун 5 минг долларга қотил ёллаган 26 ёшли тадбиркор қўлга олингани тўғрисида хабар берилганди. Маҳаллий телевидениеда қотиллик буюртма қилган жиноятчи бўйича лавҳа намойиш этилган бўлиб, унда буюртмачи томонидан ёлланган шахсга йўлланган аудиоёзув ҳам келтирилган.
Маълумотларга кўра, 7 декабрь куни шахсини сир сақлашни сўраган Х. исмли фуқаро ариза билан мурожаат қилиб, таниши тадбиркор Ж.З. уни ўзига рақобатчи деб билган бошқа бир тадбиркорни ўлдиришга буюртма қилиб, эвазига 5 минг АҚШ доллари беришни ваъда қилган. 10 декабрь куни Сирдарё вилояти прокуратураси томонидан бошқа ҳуқуқни муҳофаза қилувчи органлар билан ҳамкорликда ўтказилган тезкор тадбирда Х. исмли шахс Гулистон шаҳрида жойлашган қабристон яқинида тадбиркорни қотиллик аломатлари билан ётган, юз ва бош қисми грим қилинган жасади ва уни вафот этгани сунъий равишда яратилган фотосуратини кўрсатган. Буюртмачи тадбиркор Ж.З. Мирзаобод тумани «Боғистон» маҳалласи ҳудудида унга 4 минг долларни берган вақтида ушланган.
Видеолавҳада қотилликни буюртма қилган шахснинг талаблари ёзиб олинган аудио ҳам эълон қилинган.
«Конкрет йўқ қилиш керак. Шундай телефон қилиш керак, қаердасан, кел шу ерга, дейиш керак... Мурдани кўриш керак, бўлди. Пулини бераман. Мурдани кўрамиз, бўлди, чиқиб кетамиз.
Йўлимиздан чиққан одамни йўқ қиламиз, бошқа иложи йўқ. Шунда катталар ҳам тан беради. Ўлдирсангиз ҳам орган нима қилади? Ҳуҳҳ деб (енгил) нафас олади, битта ҳароми камайди, деб. Мана ‘тангаъси, ака. Ўликни шундай кўраман, бўлди, мен хурсанд бўламан», — дейилади аудиода.
Воқеадан хабардор бўлганлардан бири ижтимоий тармоқда ёзишича, қотилликни буюртма қилган шахс Сирдарё вилоятидаги боғчаларга озиқ-овқат таъминоти билан шуғулланувчи тадбиркор бўлган. У ўлдиришни истаган шахс эса тўғридан-тўғри рақобатчиси бўлгани айтилмоқда.
Ҳолат юзасидан Сирдарё вилояти прокуратураси томонидан Ж.З.га нисбатан Жиноят кодексининг 25 ва 97-моддаси 1-қисми (қасддан одам ўлдиришга суиқасд қилиш) билан жиноят иши қўзғатилган. Бу жиноятни содир этганлиги исботланган шахс 10 йилдан 15 йилгача озодликдан маҳрум қилиниши мумкин.
Изоҳ (0)