Сиёсатчи Алексей Навальний унга нисбатан Федерал хавфсизлик хизмати (ФСБ) томонидан уюштирилган суиқасд президент Владимир Путиннинг буйруғи билан амалга оширилганига ишончи комиллигини айтди. Meduza’нинг хабар беришича, бу ҳақда у «Эхо Москви» радиостанцияси эфирида маълум қилди.
«Путин ушбу вазиятни бошқараётганига менда заррача шубҳа йўқ», — деган Навальний.
«Биз бу ерда ўнлаб одамлар, шу жумладан, бир нечта ФСБ генераллари иштирок этган қарийб тўрт йил давом этган операцияни кўряпмиз», — деган сиёсатчи ва ФСБ директори Александр Бортников Путин буйруғисиз ҳеч қачон бундай қилмаслигини, чунки бу Жиноят кодексига кўра ҳақиқий террорчилик ҳаракати» эканлигини қўшимча қилган.
Россия ҳукумати Алексей Навальнийга қилинган суиқасдга алоқадорлигини аввалроқ бир неча бор рад этган, шунингдек, сиёсатчи заҳарланиши фактини шубҳа остига олган.
14 декабрь куни Навальнийнинг заҳарлангани бўйича The Insider, Bellingcat ва CNN’нинг Der Spiegel иштирокида ҳамкорликда ўтказилган текширув натижалари эълон қилинди. Тергов муаллифлари сиёсатчига суиқасдни Томскда ФСБ криминалистика институти ниқоби остида ҳаракат қилган ФСБ махфий бўлимининг 8 нафар тезкор ходими томонидан амалга оширилган, деган хулосага келган. Тергов ҳужжатида суиқасд тафсилотлари ҳам, унда иштирок этган ФСБ ходимларининг исм-шарифлари ҳам ошкор қилинган.
New York Times газетасининг Германия разведка хизматидаги манбаси The Insider, Bellingcat ва CNN томонидан Der Spiegel иштирокида ўтказилган тергов «биз билган ҳамма нарсани қамраб олган»ини билдирган.
Навальний унинг заҳарланиши ортида Путин турганини аввал ҳам таъкидлаганди. Европа Иттифоқи Алексей Навальнийнинг заҳарлангани сабабли Россиянинг олти нафар мансабдор шахсига қарши санкция жорий қилган.
Изоҳ (0)