Odatda darvozabonlarga yarim jamoa deya ta’rif beriladi. Biroq so‘nggi yillarda guvohi bo‘lyapmizki, ular nafaqat yarim, balki butun boshli jamoaning joniga oro bo‘lmoqda. O‘z navbatida bu transfer bozorida ham isbotini topib, malakali va iqtidorli darvozabonlarga bo‘lgan talab tobora oshib bormoqda. To‘g‘ri anglaganingizdek, hozir dunyoning ayni damdagi eng yaxshi golkiperlari haqida fikr yuritamiz.
Manuel Noyer (“Bavariya”, Germaniya)
Uzoq yillar davomida barqaror o‘yin ko‘rsatgan va hatto “Oltin to‘p” uchun da’vogar bo‘lgan Noyerning o‘yinida so‘nggi yillarda tan olish lozim, biroz pasayish kuzatildi. Albatta, bunga qaysidir ma’noda yosh va vaqtning ham ta’siri bo‘ldi. Shunga qaramay, 34 yoshli tajribali darvozabon iqtidori va o‘ziga bo‘lgan ishonchi tufayli hamon e’tirozlarsiz eng zo‘rlari qatorida tilga olinmoqda.
Alisson (“Liverpul”, Braziliya)
Bugungi kunda “Liverpul”ni braziliyalik posbonsiz tasavvur qilish mushkul. Aynan uning kelishi bilan jamoada darvozabonlar taqchilligiga barham berildi. Bundan tashqari Alisson terma jamoasi safida ham ishonchli o‘yinlar ko‘rsatib kelmoqda. Alisson ayni damda dunyoning eng yaxshi ikki darvozabonining biridir.
Yan Oblak (“Atletiko”, Sloveniya)
Sloveniyalik posbonning o‘yiniga nazar tashlanar ekansiz, go‘yo uning nozik jihati yo‘qdek. 2014-yildan beri “matraschilar” sharafini himoya qilib kelayotgan Oblak o‘zining chiqishlari va chiziqdan olib chiqilgan to‘plari bilan tanilgan. U deyarli xato qilmaydi va sheriklaridan ham shuni talab qiladi.
Mark-Andre ter Shtegen (“Barselona”, Germaniya)
2014-yilda katalon klubiga o‘tgan ter Shtegen Ispaniyadagi dastlabki ikki mavsumida Klaudio Bravoning soyasida qolib ketdi va atigi 7 ta o‘yin o‘tkazdi, xolos. Hozir esa muxlislarni bunga ishontirish qiyin. “Barselona”ning tanqid qilinmaydigan kam sonli o‘yinchilaridan bo‘lgan posbon ayni damda 28 yoshda. Shunday ekan, u hali yana bir necha yil o‘z darajasida o‘ynay oladi.
Tibo Kurtua (“Real”, Belgiya)
Ilk mavsumdagi muvaffaqiyatsizliklardan keyin ayovsiz tanqidlar yomg‘iriga uchragan Kurtua 2019/20-yilgi mavsumdan boshlab o‘ziga kela boshladi va pozitsiyasini tiklab oldi. “Qirollik klubi”ning La Liga 2019/20-yilgi mavsumidagi chempionligida esa Tiboninng hissasi beqiyos bo‘ldi. Hozirga kelib u haqli ravishda o‘z hamkasblari orasida yetakchilardan biri hisoblanadi.
Ederson (“Manchester Siti”, Braziliya)
Ederson o‘zining foydali va tomoshabop o‘yinlari bilan tezda “Manchester Siti” tarkibiga kirib keldi va qisqa muddat ichida Premyer Ligani zabt etishga erishdi. Birinchi mavsumda (2017-yilda “Siti”ga o‘tgan) 17 ta “quruq” o‘yin o‘tkazgan bo‘lsa, keyingisida bu ko‘rsatkich 20 taga yetdi. Gvardiola braziliyalik uchun sarflangan 40 million yevroga umuman afsuslanmaydi, Ederson “Manchester Siti” uslubiga juda mos keladi. Xalqaro miqyosdagi uning yagona muammosi, Alisson bilan vatandosh bo‘lganidir.
Keylor Navas (PSJ, Kosta-Rika)
Ajoyib darvozabon va kamtar inson Keylor Navasga ortiqcha ta’rif berishga hojat yo‘q. Bunga yaqqol misol qilib, PSJ futbolchilarining jamoa Chempionlar Ligasida “Borussiya D”ni mag‘lubiyatga uchratgandan so‘ng Erling Holandni masxara qilishga qaror qilganida, uning buni qat’iyan rad etganini keltirish mumkin. “Real Madrid” darvozada aynan Keylor bilan uch bor Chempionlar Ligasida g‘alaba qozongan, faqat uni yomon ko‘radiganlargina Navasning “qirollik klubi” muvaffaqiyatiga qo‘shgan hissasini ko‘r(ol)masligi mumkin. Keylorning o‘zi xohlamasa-da, “qaymoqranglilar” u bilan hamkorlikni to‘xtatdi, ammo kosta-rikalik Parijda ham “yo‘qolib” qolgani yo‘q.
Janluiji Donnarumma (“Milan”, Italiya)
1999-yilda tug‘ilgan Donnarumma 2015-yildayoq “Milan” bilan professional shartnoma imzolagandi. Bugungi kunga kelib esa u nafaqat “Milan”, balki, Italiya milliy jamoasining ham asosiy darvozaboni hisoblanadi. Uni hatto Buffonning vorisi ham atashadi. Shuning o‘zi uning qanchalik iqtidorli darvozabon ekanidan dalolat berib turibdi.
Samir Handanovich (“Inter”, Sloveniya)
Allaqachon 36 yoshni qarshilagan bo‘lishiga qaramay Samir hamon nimalarga qodir ekanligini isbotlashda davom etmoqda. U terma jamoadagi faoliyatini besh yil oldin yakunlagan, boisi Sloveniya terma jamoasida yuqorida nomi keltirilgan (Oblak) darvozabon paydo bo‘lgan edi. Ammo A Seriyada sloveniyalik o‘n yildan ko‘proq vaqt davomida yuqori darajada to‘p surib kelmoqda. Albatta, Samir faoliyatining katta qismini Buffon soyasida o‘tkazdi, biroq hozirda u Italiya chempionatining eng tajribali va mohir darvozaboni hisoblanadi.
David de Xea (“Manchester Yunayted”, Ispaniya)
Aksariyat muxlislar hamon de Xeani sayyoraning eng yaxshi darvozaboni deb hisoblashda davom etmoqda, chunki bir necha yil oldin David haqiqat ham muntazam ravishda aqlbovar qilmas seyv va gravitatsiya qonunlariga zid bo‘lgan parvozlarni amalga oshirardi. Hozirda ham u ba’zi-ba’zida shunday o‘yinlar o‘tkazib turadi, ammo “Yunayted” bugungi himoyasi bilan bu darajani ushlab turish deyarli imkonsiz ish. Nima bo‘lgan taqdirda ham de Xeaning eng yaxshi darvozabonlar reytingidan (oxirgi qatorda bo‘lsa-da) o‘rin olmasligi shunchaki mantiqsiz ish bo‘lardi.
Izoh (0)