Ijaradagi uy, hashamatli mashinalar va xayriyalar. “Manchester Siti” “miyasi” Kevin de Bryuyne qanday hayot kechiradi?

Xosep Gvardiola “Manchester Siti”sining asosiy “miyasi” bo‘lgan Kevin de Bryuyne har doim maydonda o‘ta intizomli futbolchi sifatida taassurot qoldirgan va hech kim bilan keskin nizolarga bormagan. Xo‘sh, “shaharliklar” yulduzi maydon tashqarisida ham shundaymi, u qanday hayot kechiradi? Quyida aynan ushbu savollarga javob berishga va uning hashamatli hayoti haqida hikoya qilishga harakat qilamiz.

Qayerda yashaydi?

Kutilganidek, Kevin o‘z darajasidagi boshqa futbolchilar bilan solishtirganda, nisbatan kamtarona hayot kechiradi. Futbolchi oilasi bilan Manchester yaqinida, klub tomonidan ijaraga berilgan uyda istiqomat qiladi.

Uy ikki qavatdan iborat bo‘lib, hovli va ichkarida suzish havzalari mavjud. Shuningdek, bir qancha yotoqxona, mehmonxona va, albatta, oshxona bor. Bundan tashqari uyda bolalar maydonchasini ham ko‘rish mumkin.

Mashinalar

Uy o‘ziniki bo‘lmasa-da, Kevin ajoyib avtoparkning egasi hisoblanadi.

Uning garajidagi birinchi mashina, narxi 100 ming dollarlik Mercedes-Benz GLE Coupe 350 D. Ushbu mashina 249 ot kuchiga ega va 7 soniyada 100 km/soat tezlikkacha yetishi mumkin. Avtomobilning maksimal tezligi esa 226 km/soatni tashkil etadi.

O‘yinchining ikkinchi avtoulovi Range Rover bo‘lib, u de Bryuynega 200 ming dollarga tushgan. Range’ning maksimal tezligi 220 km/soatni tashkil etib, uning spidometridagi ko‘rsatkich 6,8 soniya ichida 100 chizig‘iga yetishi mumkin.

Mercedes-Benz G63 Kevinning uchinchi avtomobili hisoblanadi. Ushbu “toychoq” uchun futbolchi 150 ming dollardan voz kechgan. Uning maksimal tezligi soatiga 230 kmga yetishi mumkin.

Shaxsiy hayoti

Futbolchi 2014-yilda vatandoshi Mishel Lakrua ismli qiz bilan Genk (Belgiya) shahrida tanishadi. 2016 va 2018-yillarda ikki bor o‘g‘il farzand ko‘rgan juftlik 2017-yilning iyun oyida munosabatlarini rasmiylashtirgan.

Do‘stlari

Kevin juda kamtar va yopiq odam bo‘lgani uchun do‘stlarining soni bilan maqtana olmaydi. Uning futbol olamidagi yagona do‘sti Rahim Sterling.

Futbolchilar 2015-yilda, “Manchester Siti”ga o‘tgan vaqtlarida tanishgan, ammo bu vaqt do‘st tutinish uchun yetarli bo‘ldi. Intervyularidan birida Kevin Rahim haqida shunday degandi: “Biz Rahim bilan yaxshi aloqalarga egamiz, chunki ikkimiz ham “Siti”ga deyarli bir vaqtda kelganmiz. Matbuotda bizni ayovsiz tanqid qilishardi. Ular meni “Chelsi”dan haydalgan omadsiz degan bo‘lsa, Rahimni pul uchun “Liverpul”ni tashlab ketishda ayblardi. U bilan mashg‘ulotdan so‘ng suhbatlashdik va uning juda yaxshi yigit ekanini va u haqidagi gaplar noto‘g‘ri ekanini anglab yetdim. Rahim men futbolda uchratgan eng yaxshi va kamtar yigitlardan biri”.

Futboldan tashqari qiziqishlar

Kevin yulduz bo‘lishiga qaramay hech qachon qo‘pollik va takabburlik bilan ajralib turmagan. Futbolchi bo‘sh vaqtlarida nochorlarga yordam berishni juda yaxshi ko‘radi va hatto bir necha bor Afrikaga ham borgan. “Biz uchun suv xuddi havo kabi dunyodagi eng oddiy narsa, ammo Senegalda bunday emas. Imkoni bo‘lgan har bir kishi ularga yordam berishi kerak”, — deydi de Bryuyne Afrikadagi hayot haqida. Shuningdek, Kevin xayriya ishlari bilan shug‘ullanadi va boshqalarni ham ezgu ishlarga chorlaydi.

Daromadi qancha?

Kevinning “shaharliklar” bilan amaldagi shartnomasi 2023-yilning yozigacha mo‘ljallangan, unga ko‘ra, belgiyalikning bir yillik maoshi 15 million yevroni tashkil qiladi. Bundan tashqari barcha taniqli futbolchilar singari, de Bryuyne ham turli xil bonuslar va reklama shartnomalaridan qo‘shimcha daromad ko‘radi.