Одатда дарвозабонларга ярим жамоа дея таъриф берилади. Бироқ сўнгги йилларда гувоҳи бўляпмизки, улар нафақат ярим, балки бутун бошли жамоанинг жонига оро бўлмоқда. Ўз навбатида бу трансфер бозорида ҳам исботини топиб, малакали ва иқтидорли дарвозабонларга бўлган талаб тобора ошиб бормоқда. Тўғри англаганингиздек, ҳозир дунёнинг айни дамдаги энг яхши голкиперлари ҳақида фикр юритамиз.
Мануэль Нойер («Бавария», Германия)
Узоқ йиллар давомида барқарор ўйин кўрсатган ва ҳатто «Олтин тўп» учун даъвогар бўлган Нойернинг ўйинида сўнгги йилларда тан олиш лозим, бироз пасайиш кузатилди. Албатта, бунга қайсидир маънода ёш ва вақтнинг ҳам таъсири бўлди. Шунга қарамай, 34 ёшли тажрибали дарвозабон иқтидори ва ўзига бўлган ишончи туфайли ҳамон эътирозларсиз энг зўрлари қаторида тилга олинмоқда.
Алиссон («Ливерпуль», Бразилия)
Бугунги кунда «Ливерпуль»ни бразилиялик посбонсиз тасаввур қилиш мушкул. Айнан унинг келиши билан жамоада дарвозабонлар тақчиллигига барҳам берилди. Бундан ташқари Алиссон терма жамоаси сафида ҳам ишончли ўйинлар кўрсатиб келмоқда. Алиссон айни дамда дунёнинг энг яхши икки дарвозабонининг биридир.
Ян Облак («Атлетико», Словения)
Словениялик посбоннинг ўйинига назар ташланар экансиз, гўё унинг нозик жиҳати йўқдек. 2014 йилдан бери «матрасчилар» шарафини ҳимоя қилиб келаётган Облак ўзининг чиқишлари ва чизиқдан олиб чиқилган тўплари билан танилган. У деярли хато қилмайди ва шерикларидан ҳам шуни талаб қилади.
Марк-Андре тер Штеген («Барселона», Германия)
2014 йилда каталон клубига ўтган тер Штеген Испаниядаги дастлабки икки мавсумида Клаудио Бравонинг соясида қолиб кетди ва атиги 7 та ўйин ўтказди, холос. Ҳозир эса мухлисларни бунга ишонтириш қийин. «Барселона»нинг танқид қилинмайдиган кам сонли ўйинчиларидан бўлган посбон айни дамда 28 ёшда. Шундай экан, у ҳали яна бир неча йил ўз даражасида ўйнай олади.
Тибо Куртуа («Реал», Бельгия)
Илк мавсумдаги муваффақиятсизликлардан кейин аёвсиз танқидлар ёмғирига учраган Куртуа 2019/20 йилги мавсумдан бошлаб ўзига кела бошлади ва позициясини тиклаб олди. «Қироллик клуби»нинг Ла Лига 2019/20 йилги мавсумидаги чемпионлигида эса Тибониннг ҳиссаси беқиёс бўлди. Ҳозирга келиб у ҳақли равишда ўз ҳамкасблари орасида етакчилардан бири ҳисобланади.
Эдерсон («Манчестер Сити», Бразилия)
Эдерсон ўзининг фойдали ва томошабоп ўйинлари билан тезда «Манчестер Сити» таркибига кириб келди ва қисқа муддат ичида Премьер Лигани забт этишга эришди. Биринчи мавсумда (2017 йилда «Сити»га ўтган) 17 та «қуруқ» ўйин ўтказган бўлса, кейингисида бу кўрсаткич 20 тага етди. Гвардиола бразилиялик учун сарфланган 40 миллион еврога умуман афсусланмайди, Эдерсон «Манчестер Сити» услубига жуда мос келади. Халқаро миқёсдаги унинг ягона муаммоси, Алиссон билан ватандош бўлганидир.
Кейлор Навас (ПСЖ, Коста-Рика)
Ажойиб дарвозабон ва камтар инсон Кейлор Навасга ортиқча таъриф беришга ҳожат йўқ. Бунга яққол мисол қилиб, ПСЖ футболчиларининг жамоа Чемпионлар Лигасида «Боруссия Д»ни мағлубиятга учратгандан сўнг Эрлинг Ҳоландни масхара қилишга қарор қилганида, унинг буни қатъиян рад этганини келтириш мумкин. «Реал Мадрид» дарвозада айнан Кейлор билан уч бор Чемпионлар Лигасида ғалаба қозонган, фақат уни ёмон кўрадиганларгина Наваснинг «қироллик клуби» муваффақиятига қўшган ҳиссасини кўр(ол)маслиги мумкин. Кейлорнинг ўзи хоҳламаса-да, «қаймоқранглилар» у билан ҳамкорликни тўхтатди, аммо коста-рикалик Парижда ҳам «йўқолиб» қолгани йўқ.
Жанлуижи Доннарумма («Милан», Италия)
1999 йилда туғилган Доннарумма 2015 йилдаёқ «Милан» билан профессионал шартнома имзолаганди. Бугунги кунга келиб эса у нафақат «Милан», балки, Италия миллий жамоасининг ҳам асосий дарвозабони ҳисобланади. Уни ҳатто Буффоннинг вориси ҳам аташади. Шунинг ўзи унинг қанчалик иқтидорли дарвозабон эканидан далолат бериб турибди.
Самир Ҳанданович («Интер», Словения)
Аллақачон 36 ёшни қаршилаган бўлишига қарамай Самир ҳамон нималарга қодир эканлигини исботлашда давом этмоқда. У терма жамоадаги фаолиятини беш йил олдин якунлаган, боиси Словения терма жамоасида юқорида номи келтирилган (Облак) дарвозабон пайдо бўлган эди. Аммо А Серияда словениялик ўн йилдан кўпроқ вақт давомида юқори даражада тўп суриб келмоқда. Албатта, Самир фаолиятининг катта қисмини Буффон соясида ўтказди, бироқ ҳозирда у Италия чемпионатининг энг тажрибали ва моҳир дарвозабони ҳисобланади.
Давид де Хеа («Манчестер Юнайтед», Испания)
Аксарият мухлислар ҳамон де Хеани сайёранинг энг яхши дарвозабони деб ҳисоблашда давом этмоқда, чунки бир неча йил олдин Давид ҳақиқат ҳам мунтазам равишда ақл бовар қилмас сейв ва гравитация қонунларига зид бўлган парвозларни амалга оширарди. Ҳозирда ҳам у баъзи-баъзида шундай ўйинлар ўтказиб туради, аммо «Юнайтед» бугунги ҳимояси билан бу даражани ушлаб туриш деярли имконсиз иш. Нима бўлган тақдирда ҳам де Хеанинг энг яхши дарвозабонлар рейтингидан (охирги қаторда бўлса-да) ўрин олмаслиги шунчаки мантиқсиз иш бўларди.
Изоҳ (0)