Uy, oila, mashinalar va xayriyalar. Futbol dahosi Zinedin Zidanning hashamatli hayoti

Futbolchilik faoliyatidan so‘ng uzoq yillar davomida “Real Madrid” murabbiylar shtabi va klub tizimida tajriba orttirgan Zinedin Zidan qandaydir bir ikki yil ichida top-darajadagi murabbiyga aylandi va hech bir mutaxassisga nasib etmagan natijalarga erisha oldi. Muxlislarni esa dahoning natijalaridan tashqari qanday hayot kechirishi ham qiziqtiradi. Quyida Zidaning hashamatli hayoti haqida hikoya qilamiz.

Qayerda yashaydi?

Zidanning uyi Madridning obro‘li tumanlaridan biri bo‘lgan Pioverada joylashgan, “Santyago Bernabeu” va uyning orasidagi masofa 5–6 kilometrni tashkil qiladi. Uyning fotosuratlari juda ham ko‘p emas, lekin undagi ulkan hovuz darhol diqqatni tortadi.

Shuning bilan birga uning hashamatli ekaniga ham hech qanday shubha yo‘q. E’tiborga molik jihati, Zizu ikki bor o‘g‘rilik qurboniga aylangan bo‘lishiga qaramay u yerdan ko‘chish haqida o‘ylamagan.

Mashinalari

“Qirollik klubi” bosh murabbiyining garajiga ham havas qilsa arziydi — uning avtoparkidan Bentley Mulsanne (300 ming dollar), Range Rover Vogue (200 ming dollar), Audi RS6 (200 ming dollar) va Audi TT (taxminan, 30 ming dollar atrofida) kabi qimmatbaho mashinalar o‘rin olgan.

Oilasi

Zidan to‘rt o‘g‘lining onasi Veronika bilan 1994-yilda turmush qurgan. Farzandlarning barchasi otasi izidan ketib, millionlar o‘yini sohasini tanlagan. Biroq hali ular yosh va aytarli katta yutuqlarga erishmagan. Zidan esa har doim o‘zining oilaparvarligi bilan barchaga namuna bo‘lib kelgan.

Do‘stlari kim?

Afsonaviy fransuzning do‘stlari haqida gap ketganda Zizuning 30 yillik do‘stini eslamaslik mumkin emas — bu uning “Real”dagi yordamchisi David Bettoni. Ular “Kan” akademiyasida birga tahsil olgan va bitta xonada yashagan. Hatto 1996-yilda Zidan “Yuventus” bilan shartnoma imzolaganida fransiyalik Turin klubidan do‘stiga ham Italiyadan jamoa topib berishni so‘raydi. Aytishlaricha, Bettoni ajoyib strateg bo‘lib, aynan u Zidanga aniq raqibga qarshi ma’lum o‘yin taktikasini tanlashda yordam berar ekan.

Shuningdek, Zidan sobiq jamoadoshi braziliyalik Ronaldo bilan ham iliq aloqalarga ega.

Futboldan tashqari qiziqishlar

Zizuning ishdan tashqari, eng sevimli mashg‘uloti, bu xayriyalar. Fransiyalik mutaxassis muntazam ravishda kasal bolalar va kam ta’minlangan oilalarning farzandlarini qo‘llab-quvvatlab keladi. Bundan tashqari u ko‘plab yulduzlar bilan birgalikda xayriya uchrashuvlarini tashkil qiladi va ularda ishtirok etadi. Umuman olganda, Zidan har tomonlama hurmatga sazovor inson.

Daromadi

Fransiyalikning Madrid klubidagi bir yillik maoshi, taxminan, 16 million yevroga (bonuslardan tashqari) teng. Taqqoslash uchun 2016-yilda (Zidan ilk marta “Real” bosh murabbiyi lavozimiga tayinlangandi) bu ko‘rsatkich 2,5 million yevroga teng edi. Shuningdek, Zidan omma e’tiborini torta olgani uchun uni tez-tez reklamalarga ham chaqirib turishadi. Uning umumiy boyligi, taxminan, 115—120 million yevroga baholangan.