Futbol bo‘yicha Osiyo Chempionlar Ligasida sharq mintaqasining chorak final uchrashuvlari 10-dekabr, payshanba kuni bo‘lib o‘tdi.
Janubiy Koreyaning “Ulsan Hyonday” jamoasi Xitoyning “Beyjing Goan”i bilan kuch sinashdi. Braziliyalik legioner Junior Negaoning dubli koreyaliklarga keyingi bosqich eshiklarini ochdi.
Ispaniyalik futbol yulduzi Adres Inyesta to‘p tepadigan “Vissel Kobe” jamoasi “Suvon” bilan bahsga kirishdi. Uchrashuvning 7-daqiqasidayoq Pak San Hyok koreyaliklarni oldinga olib chiqdi. 38-daqiqaga kelib “Suvon” Kim Te Hvanning chetlatilishidan keyin bir o‘yinchi kam bo‘lib qoldi. Oradan ko‘p o‘tmay yaponiyaliklar hisobni tenglashtirishga muvaffaq bo‘ldi.
Ikkinchi bo‘limda hisob o‘zgarmadi va qo‘shimcha bo‘limlarga murojaat qilindi. Unda ham g‘olib nomi aniqlanmagach, penaltilar seriyasi bo‘lib o‘tdi. Uzoq davom etgan seriyada yaponlar ustun keldi.
Shu tariqa sharqiy mintaqa jamoalari o‘rtasidagi yarim finalda “Ulsan Hyonday” — “Vissel Kobe” uchrashuvi bo‘lib o‘tadi. Uchrashuv 13-dekabr kuniga belgilangan. Unda g‘olib chiqqan jamoa finalda g‘arbiy mintaqa g‘olibi — “Persepolis” bilan o‘ynaydi.
OChL
Chorak final bahslari
10-dekabr, payshanba
“Ulsan Hyonday” Janubiy Koreya — “Beyjing Goan” Xitoy 2:0
Gollar: 1:0 – 21, penalti Junior Neago, 2:0 – 42 Junior Neago.“Vissel Kobe” Yaponiya — “Suvon” Janubiy Koreya 1:1
Penaltilar seriyasi — 7:6Gollar: 0:1 – 7 Pak San Hyok, 1:1 – 40 Furuhashi.
Chetlatish: Kim Te Hvan (38) — “Suvon”
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)