Vazirlar Mahkamasining “Qoraqalpog‘istonda professional futbolni rivojlantirish, “Aral” futbol jamoasini qo‘llab-quvvatlash, uning moddiy-texnik bazasini mustahkamlash hamda kadrlar salohiyatini oshirish chora-tadbirlari to‘g‘risida”gi qaror loyihasi muhokamaga qo‘yildi.
Qaror loyihasida “Aral” futbol klubining Superliga 2021-yilgi mavsumida istisno tariqasida ishtirok etishi ko‘zda tutilgan.
Mutasaddilarga 2021-yil davomida klubning moddiy-texnik bazasini yaratish, uni barcha zaruriy vositalar bilan ta’minlash vazifalari yuklatilishi belgilangan.
Unga ko‘ra Qoraqalpog‘iston Respublikasi Vazirlar Kengashiga quyidagi vazifalar yuklatiladi:
- Ikki oy muddatda O‘zbekiston davlat jismoniy tarbiya va sport universiteti Nukus filiali balansidagi Nukus shahri, Hurliman qiz baqsi ko‘chasida joylashgan Markaziy “Turon” stadionini rekonstruksiya qilish yuzasidan loyiha-smeta hujjatlarini tayyorlash va Vazirlar Mahkamasiga kiritish;
- 2021-yildan boshlab “Aral” futbol jamoasini har yili tasdiqlangan xarajatlar smeta hujjatlariga muvofiq zarur bo‘lgan mablag‘lar bilan ta’minlash;
- “Aral” futbol klubini 1 dona Yutong avtobusi (44 o‘rinlik) va 1 dona Mercedes-Benz Tourismo avtobusi (51 o‘rinlik) bilan ta’minlash va boshqa bir qator vazifalar...
Eslatib o‘tamiz, Superligada 13-o‘rinni egallagan “Andijon” jamoasi Pro-Liganing ikkinchi jamoasi — “Neftchi” bilan o‘tish o‘yinida ishtirok etadi. Agar Superliga 16 ta jamoadan iborat musobaqaga aylantirilsa, mazkur jamoalarning ikkisi ham Superligada o‘ynashi mumkin bo‘ladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)