Rossiyaning “Sputnik V” vaksinasi yaratuvchilari shved-ingliz AstraZeneca kompaniyasiga preparatlarni birlashtirishni taklif qilgandi. Meduza’ning xabar berishicha, kompaniya bu taklifni qabul qildi.
Kompaniya saytida ma’lum qilinishicha, AstraZeneca va Gamaleya tadqiqot markazi o‘zlarining AZD1222 va “Sputnik V” vaksinalari kombinatsiyasini klinik sinovdan o‘tkazishga kelishib oldi. “Turli xil vaksinalar kombinatsiyasi potensial ravishda yanada mustahkam va uzoq muddatli immun javobini shakllantirishi mumkin”, — deyiladi AstraZeneca xabarida.
Sinovlar 18 va undan katta yoshdagi ko‘ngillilar guruhida o‘tkaziladi.
“Sputnik V” yaratuvchilari vaksinalardan birgalikda qo‘llash imkoniyati sinovdan o‘tkazilishini tasdiqlab, bu borada Twitter’da kelishuvga erishilganini ta’kidlagan.
Britaniyaning AstraZeneca kompaniyasi COVID-19’ga qarshi vaksinani Oksford universiteti bilan birgalikda ishlab chiqmoqda.
AZD1222 va “Sputnik V” vektorli vaksinalar bo'lib, unda inson tanasiga SARS-CoV-2 genetik ma’lumotlarini yetkazib berish uchun boshqa virus — vektorga asoslangan tashuvchi ishlatiladi.
“Sputnik” holatida bu ikkita odam adenoviruslari (26 turi va 5 turi), AZD1222 holatida, shimpanze adenovirus (ChAdOx1). Barcha holatlarda vektorlar inson tanasida ko‘paymaydi.
Eslatib o‘tamiz, AstraZeneca o‘zining koronavirusga qarshi vaksina samaradorligini dastlabki tahlillari haqida xabar berib, uni ko‘ngillilarning bir guruhi uchun 90 foiz, ikkinchisi uchun 62 foiz deb baholagandi. “Sputnik V” ishlab chiquvchilari 39 ta bemor haqidagi dastlabki ma’lumotlarga asoslanib, o‘z vaksinalari samaradorligini 95 foizga baholagan.
Izoh (0)