Россиянинг «Спутник V» вакцинаси яратувчилари швед-инглиз AstraZeneca компаниясига препаратларни бирлаштиришни таклиф қилганди. Meduza’нинг хабар беришича, компания бу таклифни қабул қилди.
Компания сайтида маълум қилинишича, AstraZeneca ва Гамалея тадқиқот маркази ўзларининг AZD1222 ва «Спутник V» вакциналари комбинациясини клиник синовдан ўтказишга келишиб олди. «Турли хил вакциналар комбинацияси потенциал равишда янада мустаҳкам ва узоқ муддатли иммун жавобини шакллантириши мумкин», — дейилади AstraZeneca хабарида.
Синовлар 18 ва ундан катта ёшдаги кўнгиллилар гуруҳида ўтказилади.
«Спутник V» яратувчилари вакциналардан биргаликда қўллаш имконияти синовдан ўтказилишини тасдиқлаб, бу борада Twitter’да келишувга эришилганини таъкидлаган.
Британиянинг AstraZeneca компанияси COVID-19’га қарши вакцинани Оксфорд университети билан биргаликда ишлаб чиқмоқда.
AZD1222 ва «Спутник V» векторли вакциналар бўлиб, унда инсон танасига SARS-CoV-2 генетик маълумотларини етказиб бериш учун бошқа вирус — векторга асосланган ташувчи ишлатилади.
«Спутник» ҳолатида бу иккита одам аденовируслари (26 тури ва 5 тури), AZD1222 ҳолатида, шимпанзе аденовирус (ChAdOx1). Барча ҳолатларда векторлар инсон танасида кўпаймайди.
Эслатиб ўтамиз, AstraZeneca ўзининг коронавирусга қарши вакцина самарадорлигини дастлабки таҳлиллари ҳақида хабар бериб, уни кўнгиллиларнинг бир гуруҳи учун 90 фоиз, иккинчиси учун 62 фоиз деб баҳолаганди. «Спутник V» ишлаб чиқувчилари 39 та бемор ҳақидаги дастлабки маълумотларга асосланиб, ўз вакциналари самарадорлигини 95 фоизга баҳолаган.
Изоҳ (0)