AQShda 100 dan ortiq respublikachi-kongressmen saylov natijalari qayta ko‘rib chiqilishini qo‘llab-quvvatladi

AQSh kongressi vakillar palatasining Respublikachilar partiyasidan bo‘lgan 106 a’zosi amaldagi davlat rahbari Donald Trampning raqibi — demokrat Jo Bayden g‘alabaga erishgan bir qator shtatlarda prezident saylovi natijalarini qayta ko‘rib chiqish haqidagi da’voni qo‘llab-quvvatladi, deb yozadi “RBK”.

Gap Jorjiya, Michigan, Pensilvaniya va Viskonsin shtatlari haqida bormoqda. Respublikachilar “sud do‘stlari” murojaatini bergan. Amerika huquq tizimida sud mojarosining to‘g‘ridan to‘g‘ri ishtirokchisi bo‘lmagan manfaatdor shaxslar shunday ataladi. Ular o‘z fikrini bildirish maqsadida sudga yozma murojaat qilish huquqiga ega. Unda, xususan, saylovlarda yo‘l qo‘yilgan qonun buzilishlari natijalarni va Amerika saylov tizimining yaxlitligini shubha ostiga qo‘yadi.

8-dekabr kuni Texas bosh prokurori Ken Pekston to‘rtta shtatda prezident saylovi natijalarini qayta ko‘rib chiqishni so‘rab Oliy sudga ariza bergan edi. Hokimiyat tepasida respublikachilar bo‘lgan 17 ta shtat vakillari ushbu da’voni qo‘llab-quvvatladi.

Gap Missuri, Alabama, Arkanzas, Florida, Indiana, Kanzas, Luiziana, Missisipi, Montana, Nebraska, Shimoliy Dakota, Oklaxoma, Janubiy Karolina, Janubiy Dakota, Tennessi, Yuta va G‘arbiy Virjiniya haqida bormoqda.

Pekston Jorjiya, Michigan, Pensilvaniya va Viskonsin shtatlarida (ularning barchasida demokrat Jo Bayden g‘olib bo‘lgan) saylov natijalari haqiqiy emas deb topilishiga erishmoqchi. Texas bosh prokurori fikricha, ushbu shtatlarda, shu jumladan, pochta orqali yuborilgan byulletenlarni ko‘rib chiqishga aloqador me’yorlarga rioya qilinmagan.

Donald Tramp 3-noyabrda bo‘lib o‘tgan saylovlarda mag‘lub bo‘lganini tan olmay, saylov natijalari qalbakilashtirilganini da’vo qilmoqda. U ba’zi muhim shtatlarda ovoz berish yakunlari qayta ko‘rib chiqilishini talab qilib, buning uchun 9 million dollar ham sarfladi. Ammo byulletenlarning qayta sanab chiqilishi Baydenning g‘alabasini ko‘rsatdi. Sudlar ham amaldagi prezident jamoasining ovoz berish va byulletenlarni hisoblash jarayonidagi qonun buzilishlari haqidagi da’volarini rad etdi.