Rossiyada 11-dekabr holatiga ko‘ra yana 28 585 kishi COVID-19’ga chalingani tasdiqlandi, deb xabar bermoqda Meduza virusga qarshi kurashuvchi shtabga tayanib. Bu bir kun avvalgi ko‘rsatkichdan 658 taga ko‘p.
Eng ko‘p kasallanganlar Moskva (bir sutkada 7215 kishi), Sankt-Peterburg (3779 kishi) va Moskva viloyatida (1370 kishi).
Kasallanganlarning umumiy soni 2 597 711 nafarga yetdi.
Shtab ma’lumotlariga ko‘ra, so‘nggi bir kecha-kunduzda bemorlarning yana 613 nafari infeksiyadan vafot etdi. Bu kuzatuvlar boshlanganidan beri sutkalik o‘limlar soni bo‘yicha eng yuqori ko‘rsatkich. Mamlakatda bahordan buyon jami 45 893 kishi koronavirusdan vafot etgan.
Sog‘ayganlarning umumiy soni 2 059 840 nafarni tashkil qilmoqda, shu jumladan, o‘tgan sutka davomida kasalxonadan 26 171 nafar bemor tuzalib chiqqan.
Mamlakatda COVID-19’ni aniqlash uchun 81,5 milliondan ortiq laboratoriya tekshiruvi, shu jumladan, so‘nggi 24 soat ichida 543 mingta test o‘tkazilgan.
Avvalroq Rossiyada koronavirus oqibatidagi o‘limlar bo‘yicha haqiqiy holatni “Rosstat” ma’lumotlaridan bilib olish mumkinligi, lekin u yerda ma’lumotlar juda kechikib berilishi va “Stopkoronavirus.rf” saytida ko‘rsatilgan o‘limlar soni bilan to‘g‘ri kelmasligi, ular mamlakat bo‘yicha o‘rtacha 4—5 marta ko‘proqligi ma’lum qilingandi. Keyinroq bosh vazir o‘rinbosari Tatyana Golikova holatga izoh berib, “Rosstat”ning koronavirus bilan bog‘liq o‘lim statistikalari ishonchli ekanligini aytgan. Uning so‘zlariga ko‘ra, shtabning kunlik statistik ma’lumotlariga faqat ilgari PZR testi natijasi ijobiy chiqqan odamlarning o‘limi kiritiladi. “Rosstat” statistikasiga koronavirus o‘limning asosiy yoki qo‘shimcha sababi sifatida aniqlangan barcha holatlar kiritiladi.
Izoh (0)