Fransiya bosh vaziri Jan Kasteks mamlakatda 15-dekabrdan komendantlik soatini e’lon qildi, u soat 20:00 dan soat 06:00 gacha amal qiladi, deb yozadi “RBK” hukumat rahbari Twitter’iga tayanib.
Kasteks matbuot anjumanida ma’lum qilishicha, komendantlik soati Yangi yil kechasi ham kuchda bo‘ladi.
Kinoteatr, teatr va muzeylar rejalashtirilganidek 15-dekabr kuni ochilmaydi, balki yana uch haftaga — kamida 7-yanvargacha yopiq bo‘ladi, dedi bosh vazir. Uning so‘zlariga ko‘ra, fransiyaliklar komendantlik soati amal qiladigan tungi vaqtdan tashqari boshqa paytlarda mamlakat bo‘ylab bemalol harakatlanishi mumkin. Bundan tashqari, u qayerda buning imkoni bo‘lsa, masofadan ishlashni saqlab qolishni taklif qildi. Bar va restoranlar ham yopiqligicha qoladi.
Fransiya ichki ishlar vaziri Jerald Darmanen aniqlik kiritishicha, komendantlik soati mamlakatning dengiz ortidagi hududlariga tegishli bo‘lmaydi.
So‘nggi ma’lumotlarga ko‘ra, Fransiyada 2,3 million kishi koronavirusga chalingan, 56,9 mingdan ortiq bemor vafot etgan.
Noyabr oxirida Fransiya prezidenti Emmanuel Makron koronavirus infeksiyasi tufayli joriy qilingan cheklovlar bosqichma-bosqich bekor qilina boshlashini e’lon qilgan edi. 28-noyabrdan mamlakatda do‘konlar ochilishi, shuningdek, fuqarolar ochiq havoda sport bilan shug‘ullanishi va ko‘pi bilan 30 kishilik diniy tadbirlarga borishi mumkin bo‘lishi kerak edi.
Agar mamlakatdagi epidemiologik vaziyat yaxshilansa va reanimatsiyadagilar soni 2,5—3 ming kishidan oshmasa, o‘zini o‘zi yakkalash rejimi 15-dekabrdan bekor qilinishi kerak edi. Kinoteatrlar, teatrlar va muzeylar ochilishi, shuningdek, bino ichidagi tadbirlarga ruxsat berilishi kutilayotgan edi. Ayni vaqtda soat 21:00 dan soat 07:00 gacha komendantlik soati joriy etilishi, faqat Rojdestvo va Yangi yil arafasida — 24-dekabr va 31-dekabr kunlari istisno qilinishi rejalashtirilgan edi.
Oktabr oxirida karantin haqida mamlakat prezidenti Emmanuel Makron e’lon qilgan edi. U ommaviy tadbirlar bekor qilinishi, ko‘p sonli odamlar to‘planadigan joylar, xususan, bar va restoranlar yopilishi, buning imkoniyati bo‘lgan barcha korxonalarda masofadan ishlash formati joriy etilishini aytgandi. Shundan so‘ng 30-oktabrdan 1-dekabrgacha umumiy karantin joriy qilindi. Ulgurji savdo muassasalari, maktablar va maktabgacha ta’lim muassasalari, maktabdan tashqari mashg‘ulotlar o‘tkazuvchi muassasalar, mehmonxonalar, barcha sog‘liqni saqlash muassasalari, jamoat transporti o‘z ishini davom ettiradi.
6-noyabrdan esa Parijda COVID-19 tufayli tunda oziq-ovqat yetkazib berish va spirtli ichimliklar sotib olish taqiqlandi.
Izoh (0)