AQShda FDA ekspertlari Pfizer vaksinasini ma’qullashni tavsiya qildi

AQSh Oziq-ovqatlar va dorilar sifati bo‘yicha boshqarmasi (FDA) Pfizer va BioNTech kompaniyalari tomonidan ishlab chiqilgan vaksinani ma’qullashni tavsiya etdi, deb yozadi “RBK”.

Yig‘ilishda vaksinani qo‘llab-quvvatlab 17 kishi ovoz berdi, to‘rt kishi qarshi chiqdi, bir kishi betaraf qoldi.

Ekspertlar aytishicha, vaksinaning afzalliklari uning kamchiliklaridan ustunroq keladi. Guruh a’zosi, Garvard mikrobiologi Erik Rubin dorining samaradorligi “juda katta”, vaksinaning o‘zi esa “juda kuchli” ekanligini aytdi.

O‘z navbatida, Michigan universiteti Tibbiyot maktabi virusologi Oveta Fuller vaksinani ma’qullash zaruriyatiga qo‘shilmadi. Uning aytishicha, dori virusning yuqish ehtimolini pasaytirishda yordam berish-bermasligini aniqlash uchun yana kamida ikki oy ichidagi sinovlar haqidagi ma’lumotlarni ko‘rishni istagan bo‘lardi.

Keyingi qadam — vaksinaning FDA’ning o‘zi tomonidan ma’qullanishi bo‘lishi kerak. Bu 11-dekabr, juma kuni yoki dam olish kunlari amalga oshishi mumkin, deb yozadi The Wall Street Journal.

Amerika OAVlari tomonidan AQSh prezidenti deb e’lon qilingan Jo Bayden vaksinaning FDA ekspertlar guruhi tomonidan ma’qullanishini “qorong‘i vaqtdagi nur” deb atadi. Undan avvalroq esa Jo Bayden o‘z lavozimida o‘tkazilgan ilk 100 kun davomida koronavirus pandemiyasiga qarshi kurashish rejalarini ma’lum qilgan edi. Demokratning so‘zlariga ko‘ra, u prezident lavozimiga kirishganidan keyingi ilk 100 kun mobaynida uning ma’muriyati 100 millionta vaksinatsiyani amalga oshiradi. “100 kun ichida biz kasallikning kechishini va Amerikadagi hayotni yaxshi tomonga o‘zgartirishimiz mumkin”, — dedi u.

Bundan tashqari, Bayden niqob taqish bo‘yicha talablarni kuchaytirish taklifini takrorladi. Uning so‘zlariga ko‘ra, bu federal hukumatning barcha binolarida va jamoat transportida majburiy bo‘lishi kerak.

Eslatib o‘tamiz, 2-dekabr kuni Buyuk Britaniya dunyoda birinchi bo‘lib Pfizer’ning koronavirusga qarshi vaksinasidan foydalanishni ma’qullagan. Shuningdek, Pfizer va BioNTech vaksinani AQShda hamda Yevroittifoqda ro‘yxatdan o‘tkazish uchun ariza bergan.

Avvalroq Pfizer va BioNTech o‘zining BNT1622b vaksinasi tadqiqotlarning uchinchi bosqichi yakunlari bo‘yicha 95 foiz samaradorlik ko‘rsatganini ma’lum qilgandi. Taqqoslash uchun: Rossiyaning “Sputnik V” vaksinasi samaradorligi o‘z ishlab chiquvchilari tomonidan 92 foizga, Amerika Moderna kompaniyasi vaksinasi — 94,1 foizga, AstraZeneca kompaniyasi vaksinasi — 70 foizga baholangan.