Qozog‘istonning Olmaota shahri hokimligi 2020-yilda Yangi yil bayrami uchun shaharni bezash ishlariga mablag‘ ajratmaslikka qaror qildi. Olmaota ko‘chalarini bezashga mo‘ljallangan mablag‘lar boshqa maqsadlarga sarflangan, deb xabar beradi Tengrinews.
Madaniyat boshqarmasi ma’lumotlariga ko‘ra, 2020-yilda hokimlikning asosiy budjet mablag‘lari koronavirus infeksiyasiga qarshi kurashga sarflangan. “Shu sababli Yangi yilni nishonlashga bag‘ishlangan keng ko‘lamli tadbirlar, tumanlarga archalar o‘rnatish va ko‘chalarni chiroqlar bilan bezatish uchun pul ajratilmadi”, — deyiladi idora xabarida.
Hokimlik matbuot xizmatining ta’kidlashicha, o‘tgan yilgi archa qayta ta’mirlanib, 16-dekabrdan so‘ng o‘rnatiladi. Shunga qaramay, Madaniyat boshqarmasi bayram sanalarida 25 ta tadbir o‘tkazishni rejalashtirgan. Ularning asosiy qismi onlayn formatda bo‘lib o‘tadi.
“An’anaviy formatda tashkil etilgan tadbirlar shahar bosh sanitar shifokorining qarori bilan, barcha sanitariya normalariga rioya qilingan holda o‘tkaziladi. Yangi yil mushakbozligini ham o‘tkazish ko‘zda tutilmagan”, — deyiladi xabarda.
Avvalroq Tojikistonda ham koronavirus pandemiyasi sababli Yangi yil bilan bog‘liq barcha tadbirlar bekor qilingan edi. Toshkentda esa mamlakat bosh archasini o‘rnatish, bezatish, Yangi yil bayrami uchun tayyorgarlik ishlari 26-noyabrdan boshlangan.
Izoh (0)