BMT Bosh assambleyasining Qo‘shilmaslik harakatining amaldagi raisi, Ozarboyjon prezidenti Ilhom Aliyev tashabbusi bilan o‘tkazilayotgan maxsus sessiyasi koronavirus qurbonlari xotirasiga bir daqiqalik sukut saqlash bilan boshlandi, deb xabar beradi “TASS”.
“Men vakillardan o‘rinlaridan turib, koronavirus pandemiyasining barcha qurbonlari, jumladan, BMT xodimlarini bir daqiqalik sukut bilan xotirlashni iltimos qilaman”, — degan Bosh assambleyaning amaldagi raisi Vulqon Bozkir sessiya ochilishida.
U o‘zining nutqida pandemiyani “aqlbovar qilmas baxtsizlik” deb atagan. “Barchamiz pandemiya yakunlanib, hech qanday qo‘rquvlarsiz ko‘kragimizni to‘ldirib toza havo oladigan, hamkasblarimiz va oila a’zolarimiz qo‘llarini siqa oladigan kun haqida orzu qilmoqdamiz. Pandemiyaning bir necha oyidan keyin umidsizlikni his qilayotgan bo‘lishingiz mumkin, biroq tushkunlikka berilmang — biz siz uchun, qochqinlar uchun, og‘ir turmush sharoitiga ega odamlar uchun, maktabga qaytishni istayotgan bolalar uchun, infeksiyaga qarshi kurashning old saflarida tinimsiz mehnat qilayotgan tibbiy xodimlar uchun ishni davom ettirmoqdamiz — BMT siz uchun ishlamoqda, biz siz uchun birdammiz”, — deydi Bozkir.
Ilhom Aliyev Qo‘shilmaslik harakatining 4-may kunidagi onlayn-sammitida pandemiyaga qarshi kurash doirasida BMT Bosh assambleyasining davlatlar rahbarlari darajasida videoanjuman shaklida maxsus sessiyasini o‘tkazish taklifini bildirgandi. O‘shanda ushbu taklif Qo‘shilmaslik harakatiga a’zo barcha 120 ta davlat tomonidan bir ovozdan qo‘llab-quvvatlangan.
Jons Hopkins universiteti ma’lumotlariga ko‘ra, hozirda dunyoda koronavirusga chalinganlar soni 65 milliondan, infeksiya qurbonlari soni esa 1,5 million kishidan oshgan. Shu bilan birga, 45 milliondan ko‘proq bermor sog‘aygan.
Eslatib o‘tamiz, iyul oyida Qozog‘istonda koronavirusdan vafot etganlarni xotirlash maqsadida bir daqiqalik sukut e’lon qilingan edi.
Izoh (0)