Adolf Gitler Uunona ismli siyosatchi Namibiyadagi hududiy saylovda g‘olib chiqdi. Bu haqda Meduza xabar berdi.
Saylovda rasman Adolf G. Uunona ismi bilan qatnashgan Adolf Gitler Uunona o‘z okrugida 85 foiz ovoz to‘plagan. U Janubi-g‘arbiy Afrikaning xalq tashkiloti partiyasidan saylovda ishtirok etgan. Mazkur partiya Namibiya 1990-yilda Janubiy Afrikadan mustaqil bo‘lganidan buyon hukmron partiya hisoblanadi.
Germaniyaning Bild nashriga intervyu bergan Adolf Gitler Uunona millatchilar sharafiga otasi unga shunday ism qo‘yganini aytgan. “U Adolf Gitler kim bo‘lganini tushunmagan. Bolaligimda men buni umuman oddiy ism sifatida qabul qilganman va faqat o‘smirlik davrimda bu odam butun dunyoni bosib olmoqchi bo‘lganini bilganman”, — deya ma’lum qilgan siyosatchi.
Namibiya XIX asrning oxiri — XX asrning boshida Germaniya imperiyasining koloniyasi bo‘lgan. 1904—1908-yillarda mahalliy aholining qo‘zg‘oloniga javoban nemis askarlari gerero va nama qabilalaridan bir necha o‘n ming odamni o‘ldirgan. 1980-yillarda BMT bu hodisani genotsid deb atagan, XXI asrning boshida esa Germaniya buni rasman tan olgan. Biroq Germaniya hukumati Namibiyaga tovon to‘lashdan bosh tortgan.
Izoh (0)