IHTT: Jahon iqtisodiyoti 2021-yilda pandemiyadan oldingi darajaga yetadi

Yaqin ikki yil davomida jahon iqtisodiyoti rivojlana boshlaydi va 2021-yil oxiriga kelib, pandemiyadan oldingi darajaga yetadi. Bu haqda Iqtisodiy hamkorlik va taraqqiyot tashkiloti (IHTT)ning Economic Outlook yarim yillik prognozida ma’lum qilindi, deb yozadi “Gazeta.uz”.

2020-yilda keskin pasayib ketganidan keyin, dunyo bo‘yicha yalpi ichki mahsulot 2021-yilda taxminan 4,25 foizga, 2022-yilda 3,75 foizga o‘sadi, deb prognoz qilmoqda ekspertlar.

“Ilmiy progress, farmatsevtik muvaffaqiyatlar, samaraliroq kuzatuv va izolyatsiya, shuningdek, odamlar va kompaniyalar faoliyatini tuzatish virusni nazorat ostida tutishda yordam berib, asta-sekinlik bilan cheklovlarni bekor qilish imkonini beradi. Pandemiya boshida buyon amal qilayotgan, ish joylarini va firmalarni qo‘llab-quvvatlash siyosati cheklovlar bekor qilinganidan keyin qayta tiklanishni tezlashtirish imkoniyatini beradi”, — deyiladi prognozda.

Shu bilan birga, tashkilotdagilar kutishicha, qayta tiklanish mamlakatlar bo‘yicha bir tekisda bo‘lmaydi, bu esa jahon iqtisodiyotida uzoq muddatli o‘zgarishlarga olib kelishi mumkin. Boshqalardan ertaroq qayta tiklanishni boshlagan Xitoy iqtisodiyoti qat’iy ravishda o‘sib boradi, 2021-yilda jahon iqtisodiyoti o‘sishining uchdan bir qismidan ko‘prog‘i uning hissasiga to‘g‘ri keladi. IHTT mamlakatlari iqtisodiyoti kelasi yil 3,3 foizga o‘sib, qayta tiklanadi, ammo 2020-yildagi chuqur retsessiyadan faqat qisman qayta tiklanadi.

Davlatlar pandemiyadan eng ko‘p zarar ko‘rganlarga e’tibor qaratgan holda, o‘z siyosiy vositalaridan faol tarzda foydalanishda davom etishi kerak, deyiladi ma’ruzada. IHTT mutaxassislari hukumatlar uchun uchta birlamchi yo‘nalishlarni maslahat beradi, bular — eng zarur mahsulotlar va xizmatlarga investitsiyalar (ta’lim, sog‘liqni saqlash, jismoniy va raqamli infratuzilma), qashshoqlikka va tengsiz daromadlarga qarshi kurash, shuningdek, xalqaro hamkorlikni qo‘llab-quvvatlash.