БМТ Бош ассамблеясининг Қўшилмаслик ҳаракатининг амалдаги раиси, Озарбойжон президенти Илҳом Алиев ташаббуси билан ўтказилаётган махсус сессияси коронавирус қурбонлари хотирасига бир дақиқалик сукут сақлаш билан бошланди, деб хабар беради «ТАСС».
«Мен вакиллардан ўринларидан туриб, коронавирус пандемиясининг барча қурбонлари, жумладан, БМТ ходимларини бир дақиқалик сукут билан хотирлашни илтимос қиламан», — деган Бош ассамблеянинг амалдаги раиси Вулқон Бозкир сессия очилишида.
У ўзининг нутқида пандемияни «ақл бовар қилмас бахтсизлик» деб атаган. «Барчамиз пандемия якунланиб, ҳеч қандай қўрқувларсиз кўкрагимизни тўлдириб тоза ҳаво оладиган, ҳамкасбларимиз ва оила аъзоларимиз қўлларини сиқа оладиган кун ҳақида орзу қилмоқдамиз. Пандемиянинг бир неча ойидан кейин умидсизликни ҳис қилаётган бўлишингиз мумкин, бироқ тушкунликка берилманг — биз сиз учун, қочқинлар учун, оғир турмуш шароитига эга одамлар учун, мактабга қайтишни истаётган болалар учун, инфекцияга қарши курашнинг олд сафларида тинимсиз меҳнат қилаётган тиббий ходимлар учун ишни давом эттирмоқдамиз — БМТ сиз учун ишламоқда, биз сиз учун бирдаммиз», — дейди Бозкир.
Илҳом Алиев Қўшилмаслик ҳаракатининг 4 май кунидаги онлайн-саммитида пандемияга қарши кураш доирасида БМТ Бош ассамблеясининг давлатлар раҳбарлари даражасида видеоанжуман шаклида махсус сессиясини ўтказиш таклифини билдирганди. Ўшанда ушбу таклиф Қўшилмаслик ҳаракатига аъзо барча 120 та давлат томонидан бир овоздан қўллаб-қувватланган.
Жонс Ҳопкинс университети маълумотларига кўра, ҳозирда дунёда коронавирусга чалинганлар сони 65 миллиондан, инфекция қурбонлари сони эса 1,5 миллион кишидан ошган. Шу билан бирга, 45 миллиондан кўпроқ бермор соғайган.
Эслатиб ўтамиз, июль ойида Қозоғистонда коронавирусдан вафот этганларни хотирлаш мақсадида бир дақиқалик сукут эълон қилинган эди.
Изоҳ (0)