AQSh prezidenti Donald Tramp saylov halol bo‘lsagina, unda mag‘lub bo‘lishga tayyorligini bildirdi, deb yozadi “RBK”.
Davlat rahbari 46 daqiqali video yozib, unda 3-noyabrda bo‘lib o‘tgan saylov natijalari qalbakilashtirilgani haqida yana bir bor aytib o‘tdi. O‘z nutqini u “ehtimol, o‘zi so‘zlagan eng muhim nutq” deb atadi. Videoyozuvni Amerika rahbari o‘z Facebook’ida e’lon qildi.
“Men saylovda mag‘lub bo‘lishga qarshi emas, lekin u adolatli bo‘lishini xohlayman. Istamaydigan narsam shuki, saylovlar Amerika xalqidan o‘g‘irlab olinmasin”, — dedi Tramp.
Prezident saylovlarni “g‘irt falokat” deb atadi va pochta orqali ovoz berish natijasida yo‘l ochib berilgan katta ko‘lamli qalbakilashtirishlar haqida gapirdi. Uning so‘zlariga ko‘ra, “millionlab ovozlar” ikkilanuvchi shtatlarda noqonuniy ravishda olingan, shu munosabat bilan u zudlik bilan muayyan shtatlarda saylovlar natijalarini bekor qilishni talab qildi.
Amerika yetakchisi “qonuniy ovozlar” hisoblanishi uchun kurashishda davom etishini ta’kidladi. “Biz har bitta qonuniy ovoz hisoblanishi, noqonuniylari hisoblanmasligini kafolatlab, saylovning adolatliligini ta’minlamoqchimiz”, — deb va’da berdi u.
Tramp “muvofiqlashtirilgan hujum”ga uchragan AQSh saylov tizimini himoya qilishni o‘zining burchi deb atadi.
Noyabr oxirida Amerika yetakchisi uning saylovlardagi raqibi Jo Bayden “siyosiy poraxo‘rliklari” bilan mashhur bo‘lgan ba’zi shaharlardan tashqari, boshqa yirik shaharlarda yomon natijalarni ko‘rsatganini aytgandi. Uning so‘zlariga ko‘ra, Bayden Oq uyni egallashi mumkin, lekin buning uchun u ovozlarni qonuniy yo‘l bilan qo‘lga kiritganini isbotlashi kerak.
AQShda prezident saylovlari 3-noyabr kuni bo‘lib o‘tdi. Dastlabki ma’lumotlarga ko‘ra, Jo Bayden g‘olib bo‘lgan. Uning g‘alabasini 14-dekabr kuni saylovchilar hay’ati uzil-kesil tasdiqlashi kerak.
Donald Tramp o‘z mag‘lubiyatini tan olishdan bosh tortdi. Uning huquqshunoslari qator shtatlarda saylovlar natijalarini qayta ko‘rib chiqish haqida da’volar berdi, ammo ularning Baydenning foydasiga katta ko‘lamda firibgarliklar amalga oshirilgani haqidagi gaplari o‘z tasdig‘ini topmadi.
Keyinroq AQShning amaldagi prezidenti Donald Tramp 2024-yilda davlat rahbari lavozimiga o‘z nomzodini qo‘yishi mumkinligini bildirdi.
Izoh (0)