“O‘zbekneftgaz” AJ matbuot xizmati ijtimoiy tarmoqlarda 2021-yildan avtomobil yoqilg‘isi narxlari oshishi haqida tarqalgan xabarlar yuzasidan izoh berdi, deya xabar bermoqda “Kun.uz”.
Tashkilot matbuot kotibi ma’lum qilishicha, avtomobillarga yonilg‘i quyish shoxobchasida (AYoQSh) avtomobil va dizel yoqilg‘isining chakana narxi erkin shakllangan bo‘lib, unga birja savdolari orqali xarid qilingan ulgurji narx, AYoQShning sotish bilan bog‘liq xarajatlari va foydasi hamda amaldagi qonunchilikda ko‘rsatilgan soliq va boshqa majburiy to‘lovlar ham qo‘shiladi.
Moliya vazirligi tomonidan avtomobil va dizel yoqilg‘isiga to‘lanadigan aksiz solig‘i 2021-yil 1-fevraldan oshishi to‘g‘risidagi soliq kodeksiga o‘zgartirish va qo‘shimchalar kiritish bo‘yicha qonun loyihasi muhokamaga qo‘yilgan. Ushbu qonun loyihasiga ko‘ra, quyidagi neft mahsulotlariga va yakuniy iste’molchiga sotiluvchi tovarlarga solinadigan aksiz solig‘i stavkalariga o‘zgartirish va qo‘shimcha kiritilishi ko‘zda tutilmoqda:
Neft mahsulotlari:
- 1 tonna Ai-80 benzini: amalda – 200 000 so‘m, taklif – 240 000 so‘m;
- 1 tonna Ai-80, Ai-92, Ai-93 va Ai-95 benzini: amalda – 250 000 so‘m, taklif – 275 000 so‘m;
- 1 tonna dizel yoqilg‘isi: amalda – 200 000 so‘m, taklif – 240 000 so‘m;
- 1 tonna EKO dizel yoqilg‘isi: amalda – 180 000 so‘m, taklif – 216 000 so‘m.
- 1 tonna benzin: amalda – 378 480 so‘m, taklif – 465 530 so‘m;
- 1 tonna dizel yoqilg‘isi: amalda – 346 275 so‘m, taklif – 425 918 so‘m.
Avtomobillarni gaz bilan to‘ldirish kompressor stansiyalari uchun gaz “O‘ztransgaz” AJ va “Hududgazta’minot” AJ tomonidan yetkazib beriladi.
Agar muhokamaga qo‘yilgan qonun loyihasi muhokamadan o‘tmasa, yuqorida ko‘rsatilgan neft mahsulotlari narxida o‘zgarish bo‘lmasligi ta’kidlangan.
Avvalroq O‘zbekiston tovar-xom ashyo birjasida Ai-80 benzini narxi oshgani haqida xabar berilgandi.
Izoh (0)